Иранның жаңа жоғарғы көшбасшысы жараланған – Reuters

Иранның жоғарғы көшбасшысы Мұжтаба Хаменеи жеңіл жарақат алғанымен жұмысын жалғастырып жатыр. Бұл туралы Reuters агенттігі ирандық шенеунікке сілтеме жасап хабарлады.

Дереккөз аятолланың нақты қашан және қандай жағдайда жараланғанын нақтыламаған. Сондай-ақ Мұжтаба Хаменеи жоғарғы көшбасшы болып тағайындалғаннан бері не себепті жария мәлімдеме жасамағаны туралы да ақпарат берілмеген.

Бұған дейін Reuters Мұжтаба Хаменеи АҚШ пен Израильдің соққылары кезінде жарақат алуы мүмкін екенін жазды. Сол шабуылдар барысында оның әкесі, Иранның бұрынғы жоғарғы көшбасшысы Әли Хаменеи қаза тапқан еді.

Иранның мемлекеттік медиасы жанама түрде оның жараланғанын меңзейтін тіркестер қолданып жатыр. Мемлекеттік телеарна жүргізушісі Мұжтаба Хаменеиді «Рамазан соғысының жараланған ардагері» деп атаған. Иранда қазіргі АҚШ пен Израильмен қақтығыс осылай аталады.

Reuters дереккөздерінің мәліметінше, Мұжтаба Хаменеи алған жарақаты мен қауіпсіздік мәселесіне қатысты  тағайындалғаннан бері үнсіз отыр. Сонымен қатар агенттік сұхбаттастары қазіргі кезде нақты билік Ислам революциясы сақшылары корпусының (ИРСК) қолында шоғырланғанын айтады.

Дереккөздердің айтуынша, ИРСК президент Масуд Пезешкианның Парсы шығанағы елдерінен олардың аумағындағы америкалық әскери нысандарға жасалған соққылар үшін кешірім сұрағанына қатты наразылық білдірген. Reuters-ке пікір білдірген сұхбаттастардың бірі Әли Хаменеи бұған дейін корпустың ықпалын тежеп, саяси және діни элитаның пікірлерімен тепе-теңдік сақтай алғанын атап өткен.

«Енді жаңа көшбасшы толыққанды жұмыс істей алатын жағдайда болса да, негізгі шешімдерде соңғы сөз Ислам революциясы сақшылары корпусында қалуы мүмкін», – деді Reuters дереккөзі.

Агенттік дереккөздерінің мәліметінше, Мұжтаба Хаменеидің кандидатурасын алға жылжытқан да осы корпус болған. Олар оны «әкесіне қарағанда икемдірек, олардың қатаң бағытын қолдауға дайын тұлға» ретінде қарастырған.

Reuters-ке пікір білдірген бірнеше жоғары лауазымды ирандық дереккөз оның тағайындалуы сыртқы саясаттың қатаюына және ел ішіндегі қысымның күшеюіне әкелуі мүмкін деп санайды. Олардың екеуі ИРСК ықпалы күшейсе, Ислам республикасы «дінмен бүркемеленген әскери мемлекетке» айналуы мүмкін деп алаңдайды.

28 ақпанда АҚШ Израильмен бірге Иранға қарсы әскери операция бастаған. Соққылар нәтижесінде жоғарғы көшбасшы Әли Хаменеи қаза тауып, елдің әскери және ядролық нысандары зақымданған. Бұған жауап ретінде Иран Парсы шығанағындағы елдерде орналасқан америкалық базалар мен Вашингтон одақтастарының инфрақұрылымына соққы беріп жатыр.