Иранның жаңа жоғарғы көшбасшысы тағайындалды

56 жастағы Мұжтаба Хосейни Хаменеи Иранның жаңа жоғарғы көшбасшысы болып жарияланды. Бұл шешімді елдің жоғарғы діни органының бірі саналатын Сарапшылар кеңесі 8 наурызда мәлімдеді.

Кеңес шешімді АҚШ президенті Дональд Трамптың «АҚШ-тың мақұлдауынсыз таңдалған кез келген адам ұзаққа бармайды» деген ескертуіне қарамастан жариялаған.

Енді Мұжтаба Хаменеи жоғарғы көшбасшы ретінде елдегі барлық маңызды мәселе бойынша соңғы шешімді қабылдайтын болады. Бұл қызмет Иранда ең жоғары саяси және діни билікке ие саналады.

Мұжтаба Хаменеи – Иран ислам республикасының тарихындағы үшінші жоғарғы көшбасшы. 1979 жылғы ислам революциясынан кейін елді алғаш басқарған Рухолла Хомейни өмірінің соңына дейін билікте болды. Ол қайтыс болғаннан кейін 1989 жылдан бастап бұл қызметті Әли Хаменеи атқарды.

Әли Хаменеи биыл 28 ақпанда АҚШ пен Израиль Иран аумағына әуе соққыларын жасаған күні қаза тапқан еді.

Осы оқиғадан кейін аймақтағы жағдай күрт шиеленісіп, Иран жауап ретінде Израильге және АҚШ әскери базалары орналасқан елдерге зымырандар мен дрондар ұшырды.

Бұған дейін АҚШ президенті Дональд Трамп Тегеранды қарсыласуды тоқтатуға шақырып, Әли Хаменеидің орнына оның ұлы Мұжтаба Хаменеидің келуін қолдамайтынын айтқан. Ал Израиль Иранның жаңа көшбасшысы болып жарияланған адамның өміріне қауіп төнуі мүмкін екенін мәлімдеген.