Иранға қарсы жаңа майдан: Араб елдері соққыға жауап бермек

Парсы шығанағындағы араб мемлекеттерінің ынтымақтастық кеңесінің (ПШАМЫК) Министрлер кеңесі жексенбі күні өткен кезектен тыс отырысында Иранның аймақтағы бірнеше мемлекетке жасаған шабуылдарына байланысты ресми мәлімдеме жасады. Видеоконференция форматында өткен жиында Иран тарапынан БАӘ, Бахрейн, Сауд Арабиясы, Оман, Катар және Кувейт аумақтарына бағытталған соққылардың салдары талқыланды.

Кеңес мүшелері ұйымға мүше мемлекеттердің қауіпсіздігі бөлінбейтін біртұтас құндылық екенін алға тартып, кез келген мүше елге жасалған агрессия ПШАМЫК Жарғысына сәйкес барлық елге жасалған шабуыл болып саналатынын баса айтты. Бұған қоса, Министрлер кеңесі БҰҰ Жарғысының 51-бабына сүйене отырып, өз егемендігі мен тұрақтылығын қорғау мақсатында ұжымдық өзін-өзі қорғау және агрессияға лайықты жауап беру құқығын сақтап қалатынын жеткізді.

Мәлімдемеде Иранның аймақтағы шиеленісті болдырмауға бағытталған көптеген дипломатиялық талпыныстарға қарамастан, шабуылдарын тоқтатпай отырғаны айтылды. Сондықтан Кеңес өңірдегі бейбітшілікті қалпына келтіру үшін соққыларды дереу тоқтатуды талап етіп, дағдарысты шешудің жалғыз жолы - диалог пен дипломатия екенін тағы да еске салды. Осыған дейін орын алған жағдайлардың ушығуына байланысты Біріккен Араб Әмірліктері Тегерандағы елшілігін жауып, барлық дипломатиялық корпусын кері шақырып алған болатын.