Ирандағы наразылықтар: қаза тапқандар саны 2 мыңға жуықтады

Ирандағы жаппай наразылықтар салдарынан қаза тапқандар саны шамамен 2 мың адамға жеткен. Бұл туралы ирандық шенеунікке сілтеме жасаған Reuters хабарлады. Қаза болғандардың қатарында бейбіт тұрғындар да, қауіпсіздік күштерінің өкілдері де бар.

BBC News-тің орыс қызметінің мәліметінше, АҚШ-та орналасқан ирандық құқық қорғау ұйымы HRANA да осыған жуық дерек келтіреді. Ұйымның есебінше, 28 желтоқсаннан бері наразылық акцияларына қатысқан 1 847 адам және 135 күштік құрылым қызметкері қаза тапқан. Алайда бұл мәліметтерді тәуелсіз түрде растау әзірге мүмкін болмай отыр. Себебі шетелдік БАҚ өкілдерінің Иран аумағында жұмыс істеуіне тыйым салынған немесе қатаң шектеулер қойылған. Сонымен қатар елде интернет толықтай өшірілген.

Құқық қорғау ұйымдарының хабарлауынша, қауіпсіздік күштері наразылық білдірушілерге қарсы жауынгерлік оқ-дәрі қолданған, мыңдаған адам ұсталған.

Ал Иранның мемлекеттік бұқаралық ақпарат құралдары дүйсенбі күні елдегі жағдайдың тұрақталғанын мәлімдеген. Дегенмен BBC редакциясына жергілікті тұрғындардан наразылық акциялары бірнеше өңірде жалғасқанын көрсететін бейнежазбалар жолданған.

АҚШ президенті Дональд Трамп ирандықтарды наразылықты жалғастыруға шақырып, «көмек жолда келе жатқанын» мәлімдеді. Алайда оның қандай көмек екені нақтыланбады.

Еске салайық, Иранда наразылықтар 28 желтоқсанда азық-түлік пен тұрмыс тауарлары бағасының күрт қымбаттауына байланысты басталып, кейін 1979 жылғы Ислам революциясынан бері билікте отырған діни басқару жүйесіне қарсы саяси сипат алды.

Иран билігі тәртіпсіздіктерді қоздырды деп АҚШ пен Израильді айыптап, егер Вашингтон наразылықтарға араласса, АҚШ-тың әскери базаларына соққы беруі мүмкін екенін ескертті. Дональд Трамп бұған дейін де күш қолданылған жағдайда араласатынын бірнеше рет мәлімдеген.