Ирандағы наразылықтар: екі күнде 30 мыңға жуық адам қаза тапқан

Иран Денсаулық сақтау министрлігінің екі жоғары лауазымды өкілі Time басылымына 8–9 қаңтар күндері елдегі жаппай наразылықтар кезінде 30 мыңға дейін адам қаза тапқан болуы мүмкін екенін мәлімдеді. Олардың айтуынша, сол күндері қауіпсіздік күштері соншалық көп адамды өлтіргендіктен, мәйіттерді жинау мен тасымалдау мүмкіндігі таусылған.

Басылым дерегінше, мәйіт салатын қаптар жетіспей, жедел жәрдем көліктерінің орнына 18 дөңгелекті жүк көліктері пайдаланылған. Бұл мәліметтер үкіметтің бұрын жарияланбаған ішкі есебіндегі 3 117 адам туралы деректен де, құқық қорғаушылар жинаған ақпараттан да әлдеқайда жоғары.

АҚШ-та орналасқан Human Rights Activists News Agency сенбі күнгі дерек бойынша 5 459 адамның қаза тапқанын растаған және тағы 17 031 өлімді тексеріп жатыр. Алайда Time журналистері бұл сандарды тәуелсіз түрде растау мүмкін болмағанын атап өтеді. Соған қарамастан, Денсаулық сақтау министрлігіндегі деректер дәрігерлер мен жедел қызмет мамандары жинаған есептермен шамалас.

Неміс-ирандық офтальмохирург Амир Параста әзірлеген есепке сәйкес, ауруханаларда тіркелген жасырын статистика бойынша қаза тапқандар саны 30 304 адамға жеткен. Дегенмен бұл санға әскери госпитальдарда көз жұмғандар, мәйітханаларға тікелей жеткізілгендер және зерттеу қамтымаған аймақтардағы өлімдер кірмеген. Иран Ұлттық қауіпсіздік кеңесі наразылықтар ел бойынша 4 мыңға жуық жерде өткенін хабарлады.

Наразылықтар 2025 жылғы 28 желтоқсанда бағаның күрт өсуіне қарсы басталып, кейін 1979 жылғы Ислам революциясынан бері билікте отырған режимге қарсы қозғалысқа ұласқан. Алғашқы аптада қауіпсіздік күштері өлімге әкелетін құралдар қолданбағанымен, 8 қаңтарда жағдай күрт ушығып, интернет толық өшірілген.  Байланыстың үзілуі мен ақпараттың бұғатталуы қаза тапқандар санын нақтылауды қиындатқан.