Иранда 12 жастан асқан балаларды жасаққа қабылдай бастады

Иранда қауіпсіздік құрылымдарымен байланысты ерікті жасақтарға 12 жастан бастап жасөспірімдерді қабылдау басталғаны хабарланды. Бұл туралы BBC мәлімдеді.

Ақпаратқа сәйкес, бұл мәселе Тегеранда әуе соққысы кезінде 11 жастағы баланың қаза табуынан кейін халықаралық назарға іліккен. Жергілікті БАҚ мәліметінше, бала әкесімен бірге блокпостта тұрған кезде соққыға ұшыраған.

Баланың анасының айтуынша, оның ұлы әкесімен бірге «Басидж» ерікті жасақтарына көмектесіп, көшелерді патрульдеуге қатысқан. Блокпосттарда адам жетіспегендіктен, әкесі баласын өзімен бірге алып жүрген.

Осы жағдайдан кейін Иранның Ислам революциясы сақшылар корпусы «Иран үшін Отан қорғаушылары» атты бағдарламаны іске қосқан. Бағдарлама аясында 12 жастан бастап жасөспірімдер патрульдеу мен бақылау-өткізу бекеттерінде кезекшілікке тартылуы мүмкін.

Куәгерлер Тегеран, Карадж және Решт қалаларында қаруланған жасөспірімдерді блокпосттар мен жолдарда көргенін айтқан. Олардың беттері көбіне бетпердемен тұмшаланған.

Халықаралық құқық қорғау ұйымдары мұндай тәжірибені балалар құқығын бұзу және ықтимал әскери қылмыс деп бағалап, сынға алды. Сарапшылардың айтуынша, балаларды мұндай қызметке тарту кадр тапшылығының белгісі болуы мүмкін және бейбіт тұрғындар үшін қауіп тудырады.

Сонымен қатар ел ішінде интернет шектеулері, түнгі патрульдер мен жолдағы тексерістер күшейгені хабарланды.