Иран дрондары Әзербайжанға құлады: екі адам жарақат алды (ВИДЕО)

Әзербайжанда Нахчыван маңындағы әуежай аумағына ирандық ұшқышсыз ұшу аппараты құлағаны хабарланды. Сонымен қатар бірнеше дрон елдің басқа аумақтарында жарылған.

БАҚ мәліметінше, ұшқышсыз аппараттардың бірі әуежай маңына құлаған. Тағы бірнеше дрон әртүрлі жерлерде, соның ішінде Шекерабад ауылындағы мектеп ғимаратының жанында жарылған.

Оқиға кезінде мұғалімдер мен әуежай қызметкерлері эвакуацияланған. Жергілікті ақпарат құралдарының хабарлауынша, жарылыстар салдарынан екі адам жарақат алған.

Әзербайжан Сыртқы істер министрлігі Иранның дрон шабуылына байланысты ресми мәлімдеме жасап, Тегераннан оқиғаға қатысты жедел түсініктеме талап етті.

– Біз Иран Ислам Республикасынан бұл оқиғаны қысқа мерзім ішінде түсіндіріп, мұндай жағдайлардың қайталанбауы үшін шұғыл шаралар қабылдауды талап етеміз. Әзербайжан тарапы тиісті жауап шараларын қабылдау құқығын өзінде қалдырады, – делінген ведомство хабарламасында.

Осыған байланысты Иранның Әзербайжандағы елшісі елдің Сыртқы істер министрлігіне шұғыл түрде шақырылған.

Айта кетейік, бұл жағдай Таяу Шығыстағы шиеленістің күшеюі аясында орын алып отыр. 28 ақпаннан бері АҚШ пен Израиль Иран аумағына соққы жасап келеді. Ал Тегеран оған жауап ретінде Израильге және аймақтағы америкалық әскери базаларға зымырандар мен дрондар жіберіп жатыр.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от QRNews (@qrnews.kz)