Иран билігі наразылықтар аясында азаматтарға айына 7 доллар төлеуге уәде берді

Иранда жаппай наразылықтар он күннен астам уақыттан бері жалғасып жатқан тұста билік халыққа ай сайын шамамен 7 АҚШ доллары көлемінде төлем жасалатынын мәлімдеді. Бұл туралы шетелдік БАҚ үкімет өкілі Фатима Мохаджеранидің сөзіне сілтеме жасап хабарлады.

Билік өкілдерінің айтуынша, аталған шара халықтың сатып алу қабілетін қолдауға, инфляцияны тежеуге және азық-түлік қауіпсіздігін қамтамасыз етуге бағытталған. Алайда қоғамда бұл бастама күмәнмен қабылданып отыр.

Экономистердің бағалауынша, Иранда бір адамның ең төменгі айлық шығыны 200 доллардан асады. Сонымен қатар елде инфляция деңгейі өте жоғары күйінде қалып отыр. Қазіргі таңда иран риалының бағамы шамамен 1 АҚШ долларына 1,47 миллион риалға дейін әлсіреген.

Сарапшылар айына 7 доллар көлеміндегі төлемнің халықтың әлеуметтік жағдайына айтарлықтай әсер ете қоюы екіталай екенін айтады. Өмір сүру құнының қымбаттауы, жұмыссыздық пен экономикалық дағдарыс секілді наразылықтардың негізгі себептері әзірге шешімін тапқан жоқ.