Иран АҚШ-ты әскери қылмыста айыптады

Иран сыртқы істер министрлігінің ресми өкілі Исмаил Бекаи 28 ақпанда Минаб қаласындағы бастауыш мектепке жасалған шабуылды кешірілмейтін және аса ауыр әскери қылмыс деп атады. Бекаи мәлімдегендей, бұл шабуыл салдарынан 168 бала қаза тауып, жауаптылар міндетті түрде жазалануы керек.

Иран мемлекеттік телеарнасының хабарлауынша, 28 ақпанда Минабтағы «Шаджарат ат-Таййиба» қыздар мектебіне Tomahawk зымырандары қолданылған. Шабуылдан балалар мен олардың мұғалімдерін қоса алғанда 185 адам қаза тапқан.

АҚШ президенті Дональд Трамп болса, шабуылды Иран жасаған деп мәлімдеді:

«Мен көрген деректерге қарағанда, бұл шабуылды Иран өзі жасаған. Олардың оқ-дәрілерінің дәлдігі мүлде жоқ» деді.

Сонымен қатар Трамп Иранның да кейбір зымырандары бар екенін еске салды.

Алайда америкалық БАҚ материалдары жариялаған алдын ала тергеу нәтижелері бойынша, шабуыл АҚШ армиясы тарапынан жасалған болуы мүмкін деген нұсқалар да қарастырылуда. Қазіргі уақытта әскери тергеу жалғасып жатыр.