Instagram суицид туралы ізденіс жасаған балалардың ата-анасына ескерту жібереді

Instagram әлеуметтік желісі жасөспірімдердің суицид пен өзіне-өзі зиян келтіру тақырыптарына қатысты іздеу сұраныстары туралы ата-аналарға автоматты түрде хабарлама жіберу функциясын енгізеді. Бұл туралы Reuters агенттігі хабарлады.

Егер бала жүйелі түрде қауіпті контентті іздесе, бұл туралы ата-анасына жедел хабарлама барады. Бұл функция тек «Отбасылық орталық» (Family Center) бөлімі арқылы «ата-ана бақылауын» қосқан қолданушылар үшін ғана жұмыс істейді.

 16 жасқа толмаған жасөспірімдер ата-анасының рұқсатынсыз есептік жазбасындағы маңызды қауіпсіздік параметрлерін өзгерте алмайды. Сондай-ақ, ересектер баланың желідегі белсенділік уақытын бақылап, шектеулер қоя алады.

Жаңа функция алдымен АҚШ, Ұлыбритания, Австралия және Канадада сынақтан өткізіледі. Кейінірек басқа елдерге де таратылуы мүмкін.

Айта кетейік, соңғы уақытта әлем елдерінде жасөспірімдердің әлеуметтік желі қолдануын шектеу мәселесі белсенді талқылануда. Мәселен, Австралия 16 жасқа толмағандарға желілерді пайдалануға ресми түрде тыйым салды. Ұлыбритания, Испания, Греция және Словения да осындай шараларды қарастыруда.

Қазақстанда да жасөспірімдердің әлеуметтік желілердегі қауіпсіздігін реттеу мәселесі күн тәртібінде тұр.