Instagram стористерді анонимді көруге ресми түрде рұқсат берді

Meta компаниясы Instagram қолданушылары үшін «Instagram Plus» деп аталатын премиум жазылымды тестілеуден өткізіп жатқанын ресми түрде растады, деп хабарлайды TechCrunch. Енді қарапайым қолданушылар ай сайын белгілі бір сома төлеу арқылы бұрын-соңды болмаған эксклюзивті функцияларға қол жеткізе алады.

Ең басты интрига - жазылушылар біреудің сторисін оған байқатпай (анонимді түрде) көре алады. Сонымен қатар сіздің сторисіңізді кімдер қайталап көргенін (rewatch) бақылау функциясы пайда болды. Енді сіздің контентіңізге кімнің ерекше қызығушылық танытып жүргенін білу қиын емес.

Жаңа мүмкіндіктер тізімі:

• «Жақын достардан» бөлек, түрлі топтарға арналған шексіз аудитория тізімін жасау.

• Стористің уақытын тағы 24 сағатқа созу.

• Өз сторисіңізді аптасына бір рет тізімнің ең алдына шығарып, қаралымды арттыру.

• Стористерге арналған анимациялық «Суперлайк» және көрушілер тізімінен нақты бір адамды іздеу функциясы.

Бағасы қанша?

Қазіргі таңда бұл функция Мексика, Жапония және Филиппин елдерінде сынақтан өтуде. Бағасы елге байланысты 1 доллардан 2.20 долларға дейін барады. Бұл «Meta Verified»-тен бөлек, тек қарапайым қолданушылардың ыңғайлылығы үшін жасалған қызмет.

Желі қолданушыларының бір бөлігі «бәрі ақылы болып кетті» деп наразылық білдірсе, енді бірі Snapchat+ сияқты бұл жобаның да үлкен сұранысқа ие болатынына сенімді.