Хаменеи АҚШ-ты ескертті: Иранға шабуыл аймақтық соғысқа ұласады

Иранның Жоғарғы көшбасшысы Аятолла Әли Хаменеи АҚШ тарапынан жасалуы мүмкін кез келген шабуыл Таяу Шығыста ауқымды соғысқа алып келетінін ескертті. Бұл туралы BBC-дің Орыс қызметі хабарлады.

«Америкалықтар мынаны білуі керек: егер олар соғысты бастаса, бұл жолы ол аймақтық соғысқа ұласады. [Дональд Трамп] кемелер әкелгенін айтып, үнемі қорқытады. Иран халқын ондай сөздермен үркіту мүмкін емес», – деді Хаменеи жексенбі күнгі мәлімдемесінде.

Бұған дейін АҚШ президенті Дональд Трамп Иранның ядролық бағдарламасы мен ел ішіндегі наразылықтарды күшпен басып-жаншуына байланысты бірнеше рет әскер араластыру мүмкін екенін айтқан. Осы аяда АҚШ аймаққа қосымша әскери күш жіберіп, Араб теңізіне әуе тасымалдаушы кеме орналастырды. Өткен аптада Вашингтон Тегеранға екі талап қойғанын мәлімдеді: ядролық қарудан бас тарту және наразылық білдірушілерге қарсы күш қолдануды тоқтату.

Өз кезегінде Иран Ормуз бұғазында екі күндік әскери-теңіз оқу-жаттығуын өткізуге ниетті. Бұл бұғаз арқылы әлемдік мұнай саудасының шамамен бестен бірі өтеді. Бұған дейін Иран өзіне шабуыл жасалған жағдайда бұғазды жабуы мүмкін екенін ескерткен.

Сонымен қатар Иран президенті Масуд Пезешкианның әкімшілігі елдегі наразылықтар кезінде қаза тапқандардың тізімін жариялады. Ресми дерекке сәйкес, наразылықтар барысында 3 117 адам қаза болған, оның 2 986-сының жеке басы анықталған. Алайда құқық қорғаушылар бұл сан әлдеқайда көп болуы мүмкін екенін айтады. Кейбір халықаралық ұйымдар құрбандар саны 25 мыңнан асуы ықтимал деген мәлімет келтіруде.

Хаменеи өз сөзінде наразылыққа шыққандарды полицияға, Ислам революциясы сақшылар корпусына және басқа да нысандарға шабуыл жасады деп айыптап, «бүлік басылды» деп мәлімдеді.