Гонконгтегі жойқын өрттен 100-ге жуық адам қаза тапты

Гонконгтың Тай По ауданындағы Wang Fuk Court тұрғын кешенінде болған алапат өрттен кемінде 94 адам көз жұмды, деп хабарлады Reuters. Тағы ондаған тұрғын хабар-ошарсыз кеткен.

Өрт сәрсенбі күні кешке басталып, таңғы уақытта ғана толықтай дерлік сөндірілді. Төтенше жағдай кезінде кешенде 4,6 мыңнан астам адам тұрған.

Биліктің мәліметінше, 279 адам әлі де із-түзсіз жоғалғандар қатарында, алайда бұл дерек соңғы тәулікте жаңартылмаған. Бұл оқиға Гонконгтағы ең ірі өрт апаты болып отыр. Бұған дейін мұндай қайғылы жағдай 1948 жылы тіркелген, ол кезде қоймадағы өрттен 176 адам қаза тапқан еді.

Полиция Prestige Construction құрылыс компаниясының үш қызметкерін ұстаған. Оларға абайсызда кісі өліміне әкелу және қауіпті құрылыс материалдарын қолдану бойынша айып тағылды. Тергеу мәліметіне сәйкес, ғимараттың жөндеу жұмыстары кезінде тез тұтанғыш пенопласт панельдер пайдаланылып, олар терезелердің жабылып қалуына және тұрғындардың сыртқа шығуына кедергі болған.

Қазір қала билігі мен төтенше жағдай қызметтері жоғалғандарды іздестіру мен зардап шеккендерге көмек көрсетуді жалғастырып жатыр. Гонконг билігі бұл апатты соңғы онжылдықтардағы ең ауыр трагедиялардың бірі деп атады.