Германияда жергілікті сайлау алдында бірден 16 кандидат көз жұмды

Германияның Солтүстік Рейн – Вестфалия федералдық жерінде жергілікті сайлауға қатысуға тіркелген 16 кандидат қайтыс болды. Бұл туралы Bild басылымына аймақтық сайлау комиссиясының төрайымы Моника Виссманн хабарлаған.

Оның айтуынша, 16 өлім жағдайы әртүрлі партиялардан тіркелген кандидаттарға қатысты. Қайтыс болғандардың жеті кандидаты – «Германия үшін альтернатива» партиясының өкілдері. Сондай-ақ Еркін демократиялық партия, Социал-демократиялық партия, «Жасылдар», Тәуелсіз сайлаушылар қауымдастығы, Жануарларды қорғау партиясы және бірнеше шағын саяси ұйым мүшелері де бар.

Оқиғалар 14 муниципалитетте тіркелген. Бұл жағдай ел бойынша үлкен дүрбелең туғызып, интернетте түрлі конспирологиялық болжамдар тарала бастады. Дегенмен полиция алғашқы төрт жағдайда өлімнің қылмысқа немесе күдікті жағдайларға байланысты емес екенін растады.

Солтүстік Рейн – Вестфалияда өтетін бұл сайлау – жергілікті билік органдарын жасақтау науқаны. Азаматтар қалалық және ауылдық кеңестерге, аудандық жиналыстарға, сондай-ақ кей жерлерде әкімдер мен бурмистрлерге дауыс береді. Сайлау 14 қыркүйекте өтеді.