Германияда 32 мыңнан астам отбасы баспанасынан күштеп шығарылды

Германияда 2024 жылы 32 мыңнан астам пәтердің тұрғындары күштеп шығарылды. Бұл көрсеткіш өткен жылмен салыстырғанда (30 мың пәтер) айтарлықтай жоғары. Мәліметті Германияның Әділет министрлігі Бундестагтағы Солшыл партияның сауалына берген жауабында келтірген, деп хабарлады dpa агенттігі.

🔹 Қай өңірлерде көбірек болды?

Көбіне тұрғындар Солтүстік Рейн-Вестфалияда (10 118 пәтер) баспанасынан айырылған. Екінші орында – Бавария (2979 пәтер), одан кейін Төменгі Саксония (2639) және Саксония (2367).

Тек Бранденбург, Бремен, Гессен және Тюрингия жерлерінде ғана өткен жылмен салыстырғанда мәжбүрлі көшіру саны азайған.

🔹 Негізгі себеп – жалдау ақысының өсуі

Соңғы 10 жылда Германияда пәтер жалдау бағасы орта есеппен 50%-ға қымбаттаған. Үйден шығарудың ең негізгі себебі – коммуналдық және жалдау ақысын уақтылы төлемеу.

🔹 Сарапшылар не дейді?

Солшыл партия өкілі, тұрғын үй саясаты жөніндегі сарапшы Карен Лай мұндай жағдайды «әлеуметтік апат» деп атады. Ол билікті үйсіз қалу қаупі бар адамдарды мәжбүрлі көшіруге тыйым салуға, қолжетімді әлеуметтік тұрғын үй құрылысын арттыруға және жалдаушыларды қорғауды күшейтуге шақырды.

Сонымен қатар ол 70 жастан асқан адамдарды баспанасынан шығаруға толық тыйым салу қажет деп есептейді.

🔹 Баспана тапшылығы

Der Paritätische ұйымының есебіне сәйкес, 2024 жылы пәтерақыдан кейін күн көруге ақшасы жетпейтіндер саны көбейген.

Қазір мұндай қиындыққа ел халқының 22,3%-ы (шамамен 18,4 млн адам) тап болған. Бұл көрсеткіш жастар (25 жасқа дейінгі – 31%) мен зейнеткерлер арасында (65 жастан асқандардың – 29%) ерекше жоғары.

Мамандардың айтуынша, Германияда балалы отбасылардың 31%-ы және жалғызбасты ата-аналардың 25%-ы осы санаттағы әлеуметтік қиындықты бастан кешіріп отыр.