Футбол мәжбүрлі некеден құтқарады: Қалай футбол Үндістандық қыздардың еркіндік сиволына айналды?

Үндістанның Раджастхан штатында футбол қыздар үшін жай ғана ойын емес, мәжбүрлі әрі ерте некеден құтылудың басты құралына айналды, деп хабарлайды BBC. Падампура ауылының жас тұрғындары Ниша мен Мунна Вайшнавтың оқиғасы бұған айқын дәлел.

Раджастхан – Үндістандағы балалар некесінің көрсеткіші ең жоғары аймақтардың бірі. Мұнда 18 жасқа толмаған қыздарды тұрмысқа беру заңсыз болғанымен, ежелгі дәстүрлер мен кедейлік бұл үдерісті тоқтатар емес. Unicef деректері бойынша, Үндістандағы әйелдердің 25%-ы кәмелетке толмай тұрмыс құрған.

Алайда «Football for Freedom» (Бостандық үшін футбол) жобасы бұл қасаң қағиданы бұза бастады. Ниша мен Мунна есімді апалы-сіңлілі қыздар футбол арқылы ата-аналарының ерте тұрмысқа беру туралы ұсыныстарына батыл қарсы шықты.

«Ауыл әйелдері бізге саусағымен нұсқап, қысқа шорты кигеніміз үшін сөгетін. Бірақ біз оған мән бермей, ойынды жалғастырдық», - дейді Мунна.

Ниша 14 жасында футбол жаттығуы кезінде өзін келін ретінде таңдап келген әулетпен кездескен. Ол анасының талабына қарамастан, болашақ қайын жұртының алдында иіліп сәлем беруден бас тартып, спорттық мансабын таңдады. 2024 жылы Ниша Раджастхан штатының құрамасына қабылданып, Ұлттық чемпионатта өнер көрсетті.

Спортшы қыздың айтуынша, футбол – оның жалғыз махаббаты және тәуелсіздікке бастайтын жолы.

«Football for Freedom» ұйымының өкілі Падма Джошидің айтуынша, 2016 жылдан бері Раджастханның 13 ауылында 800-ден астам қыз футболға тартылған. Ұйым ата-аналарға футболдың тек ойын емес, болашақта мемлекеттік қызметке орналасуға көмектесетін мүмкіндік екенін түсіндірген.

Үндістан заңы бойынша балалар некесіне рұқсат берген немесе оны ұйымдастырған ересектер 2 жылға дейін бас бостандығынан айырылып, 100 000 рупия айыппұл арқалауы мүмкін. Дегенмен көптеген отбасылар тойды жасырын өткізеді. Ресми мәлімет бойынша, 2021 жылы елде 1050 ерте неке фактісі тіркелген, бірақ нақты көрсеткіш әлдеқайда жоғары.