Францияда жаппай наразылықтар өтті: 200-ден астам адам ұсталды

10 қыркүйекте Францияның бірнеше қаласында "Bloquons Tout" – "Бәрін бөгейміз" деген ұранмен жаппай наразылық акциялары өтті. Митингке шыққандар жолдарды жабуға тырысып, қоқыс жәшіктері мен дөңгелектерді өртеді, баррикадалар құрды және полициямен қақтығысты. Бұл туралы Le Monde газеті хабарлады.

Франция Ішкі істер министрлігінің дерегінше, ел бойынша 200-ге жуық адам ұсталды. Қоғамдық тәртіпті сақтау үшін билік 80 мыңға жуық күштік құрылым өкілін жұмылдырған, оның ішінде 6 мыңы Парижде қызмет атқарды.

Астанада тәртіп сақшылары мектепке кіреберісті бөгеген жастарға қарсы көз жасауратқыш газ қолданды. Сондай-ақ шамамен 1000 адам Гар-дю-Нор вокзалына кіруге әрекет жасағанымен, полиция оларға бөгет болды. Ренн қаласында автобус өртеніп, Нант пен Монпельеде наразылар жолды жауып, шиналарды өртеген. Полиция оларды газ қолдану арқылы таратты. Тулузада теміржол бойындағы өрт пойыз қозғалысын тежесе, Бордо қаласында бетперде киген топ блокпост орнатпақ болды.

Франциядағы ірі ақылы жол операторлары Лионнан Марсельге дейінгі өңірлерде кептелістер мен қозғалыс шектеулері болғанын мәлімдеді.

Наразылардың көбі елдегі жағдайға президент Эммануэль Макронды тікелей айыптады.

"Барлығының түпкі себебі – Макрон. Министрлер емес, оның басқару тәсілі – басты проблема. Ол қызметінен кетуі керек", – деді өзін Фред деп таныстырған шеруші.

Мұғалім Кристоф Лаланд болса:

"Премьер-министр Франсуа Байру кеткенімен, оның бюджетті қысқарту жоспары да күшін жоюы тиіс. Біз мектептер мен ауруханаларға көбірек қаржы бөлуді талап етеміз", – деді.

Ал кәсіподақ белсендісі Амар Лага:

"Біз берілмейміз. Қажет болса, өлсек те тік тұрып өлеміз", – деп мәлімдеді.

Наразылықтар парламенттің премьер-министр Франсуа Байруды қатаң үнемдеу саясатына байланысты отставкаға жібергеннен кейін күшейді. Оның орнына президент өзіне жақын саясаткер – Себастьен Лекорнені тағайындады. Оппозиция мұны ашық сынға алып, наразылықты өршітті.

"Бәрін бөгейміз" қозғалысы көктемде әлеуметтік желілерде пайда болған. Алғашында оны оңшылдар бастағанымен, кейіннен солшыл және ультрасолшыл топтар бақылауға алған. Қозғалыстың нақты жетекшісі немесе штабы жоқ, ұйым онлайн түрде жүргізіледі. Француз баспасөзі бұл наразылықтарды 2018 жылғы "сары жейделілер" толқуларымен салыстыра бастады. Ол кезде халық алдымен жанармай бағасына қарсы шыққанымен, кейін Макронның жалпы саясатына наразылық күшейген еді.