Франция ядролық қаруын көбейтпек

Франция президенті Эммануэль Макрон елдің ядролық әлеуетін нығайтудың жаңа кезеңіне өтетінін жариялады. Мемлекет басшысы бұл стратегияны «озық тежеу» (advanced deterrence) деп атады, деп хабарлайды France info.

Лонг аралындағы атомдық сүңгуір қайықтар базасында сөйлеген сөзінде Макрон бұл шешімнің бірнеше маңызды факторын атап өтті:

• Таяу Шығыстағы қаңтығыс: АҚШ пен Израильдің Иранға қарсы бастаған соғысы Еуропа шекараларына жақын маңда тұрақсыздық пен жаңа қауіптер тудыруда.
• АҚШ саясатының өзгеруі: Вашингтонның стратегиялық басымдықтарын қайта қарауы Франция мен Еуропаны өз қорғаныс қабілетін күшейтуге мәжбүр етіп отыр.
• Еуропалық қауіпсіздік: Президент еуропалық континенттің тереңдігінде тежеу стратегиясын егемендікті толық сақтай отырып қайта қарау қажеттігін алға тартты.

Эммануэль Макрон бұл стратегия ядролық оқтұмсықтар санының артуына әкелетінін нақтылады. Алайда бұрынғы тәжірибеден айырмашылығы, бұдан былай қару-жарақ саны туралы нақты деректер жарияланбайды.

«Бұрынғыдай емес, біз енді ядролық арсеналымыз туралы деректерді ашпаймыз. Бұл кез келген алыпқашпа әңгімелер мен спекуляцияларға нүкте қою үшін, сондай-ақ Францияның мүдделерін қорғау үшін қажет», - деді Макрон.

Сонымен қатар Франция президенті бұл қадамның «қарулану жарысына» қатысы жоқ екенін және елдің тек қауіпсіздік мақсатын көздейтінін баса айтты.

Франция Қарулы Күштер министрлігінің соңғы ашық деректеріне сәйкес, елдің иелігінде кемінде 300 ядролық оқтұмсық бар. Енді бұл көрсеткіш ұлттық қауіпсіздік мақсатында жабық ақпаратқа айналады.