Еуропадағы ең ірі АЭС жұмысын тоқтатты

Францияның солтүстігінде орналасқан, Батыс Еуропадағы ең ірі атом электр стансасы – «Гравлин» АЭС-і медузалардың жаппай шабуылына байланысты уақытша жұмысын тоқтатты. Électricité de France (EDF) компаниясының хабарлауынша, Солтүстік теңіз жағалауындағы стансаның су айдау жүйесіндегі сүзгілер медузалармен бітеліп, салдарынан төрт реактор автоматты түрде ажыратылған.

Үш энергоблок 10 тамыз кешінде, тағы бірі 11 тамыз таңында тоқтаған. Қалған екі реактор жоспарлы техникалық қызмет көрсетіп жатыр. Компания бұл оқиғаның нысанның, персоналдың немесе қоршаған ортаның қауіпсіздігіне әсер етпегенін мәлімдеді. Сүзгілер ядролық аймақтан тыс орналасқан.

EDF өкілінің айтуынша, медузаларға байланысты тоқтаған реакторлар 14 тамызда қайта іске қосылады деп жоспарланып отыр. Қазір мамандар өндірісті қауіпсіз қалпына келтіру жұмыстарын жүргізіп жатыр. Францияның энергетикалық жүйесінде электр тапшылығы қаупі жоқ.

Мұндай жағдайлар өте сирек кездеседі. Францияда соңғы рет медузалардың кесірінен АЭС 1990-жылдары тоқтаған. Ұқсас оқиғалар 2010-жылдары АҚШ-та, Шотландияда, Швецияда және Жапонияда тіркелген. Ғалымдар мұны мұхиттардың жылынуы және балықтың шамадан тыс аулануымен байланыстырады, бұл теңіз экожүйелеріндегі қоректік тізбектердің бұзылуына әкеледі.

«Гравлин» АЭС-і Кале қаласынан шамамен 20 шақырым солтүстік-шығысқа қарай орналасқан. Онда әрқайсысы 900 МВт қуат өндіретін алты реактор бар. 2040 жылға қарай қуаты 1600 МВт болатын тағы екі реактор салу жоспарланып отыр.