Еуропада 10 мыңнан астам қонақүй Booking.com-ға қарсы ұжымдық шағым түсірді

Еуропаның 10 мыңнан астам қонақүйі Booking.com онлайн-платформасына қарсы 20 жыл бойы жалғасқан бәсекелестікке қарсы заңнаманы бұзу деректері бойынша ұжымдық сот шағымын берді. Бұл туралы The Economic Times хабарлады.

Шағым 2024 жылы Еуропалық соттың «ең үздік баға» талабын заңсыз деп тануынан кейін жасалды. Аталған талап бойынша қонақүйлер өз сайттарында немесе басқа платформаларда Booking.com-нан арзан баға ұсына алмайтын. Сот мұндай тәжірибе бәсекелестікті шектейді және антимонополиялық заңдарды бұзады деп шешті.

Іс Booking.com штаб-пәтері орналасқан Нидерландта қаралып жатыр. Сот процесін Hotel Claims Alliance жүргізіп жатыр, бастаманы Германияның IHA, Италияның Federalberghi және Еуропалық қонақүй альянсы Hotrec секілді 30-дан астам ұлттық қонақүй қауымдастығы қолдаған.

«Еуропалық қонақүй иелері ұзақ жылдар бойы әділетсіз талаптар мен артық шығындардан зардап шекті. Цифрлық нарықтағы мұндай теріс пайдалануға қонақүй индустриясы енді төзбейді», – деді Hotrec президенті Александр Василикос.

Шағым 2004–2024 жылдар аралығын қамтиды. Қонақүй иелері Booking.com-ның бұрынғы баға саясаты олардың бәсекеге қабілеттілігін төмендетіп, қонақтарды тікелей тарту мүмкіндігін шектегенін айтады.

Ұжымдық шағымға қосылу мерзімі қолдаушылардың көптігіне байланысты 29 тамызға дейін ұзартылды.

Hotrec пен Швейцарияның Батыс қолданбалы ғылымдар және өнер университетінің бірлескен зерттеуіне сәйкес, 2023 жылы Booking Holdings Еуропадағы онлайн-қонақүй брондау нарығының 71%-ын бақылаған.