Дубай әуежайы тағы да дрон соққысына ұшырады

Дубай халықаралық әуежайы маңында дрон шабуылынан кейін өрт шығып, әуе қатынасы уақытша тоқтатылды. Reuters агенттігінің хабарлауынша, қазіргі уақытта тілсіз жау бақылауға алынған. Бұл — соғыс басталғалы бері аталған әуежайға жасалған үшінші дрон шабуылы, деп хабарлайды DW.com

Дүйсенбі, 16 наурызда БАӘ Азаматтық авиация басқармасы X әлеуметтік желісінде хабарлағандай, қауіпсіздік шараларына байланысты рейстер уақытша тоқтатылды. Жұмыстың қашан қайта жанданатыны әлі белгісіз.

Ведомство мәліметінше, бұл шешім "барлық жолаушылар мен қызметкерлердің қауіпсіздігін қамтамасыз ету мақсатындағы сақтық шарасы" ретінде қабылданған.

"Дубай әуежайы маңындағы дрон оқиғасы жанармай резервуарларының біріне әсер етті", — деп хабарлады Дубайдың баспасөз қызметі.

Полиция әуежайға апаратын жолдар мен туннельдерде қозғалыстың уақытша шектелгенін, ал Emirates әуе компаниясы Дубайға бағытталған рейстерді тоқтатқанын нақтылады. Бірқатар рейстер Аль-Мактум халықаралық әуежайына бағытталды.

Reuters-тің еске салуынша, бұл оқиға — 28 ақпанда Иранның Парсы шығанағы елдеріне жасаған шабуылдарынан бері әлемдегі ең ірі көлік хабтарының бірі болып табылатын Дубай әуежайындағы үшінші жағдай.

АҚШ пен Израильдің Иранға қарсы соғысы халықаралық авиацияда хаос тудырды. Таяу Шығыс әуе кеңістігінің басым бөлігі зымыран мен дрон шабуылдары қаупіне байланысты жабық қалып отыр, бұл рейстердің тоқтатылуына, кешігуіне және жанармай бағасының күрт өсуіне әкеп соқты.

БАӘ билігінің мәлімдеуінше, соғыс басталғалы бері елдің әуе қорғанысы жүйесі 1500-ден астам ирандық дронды және 300-ге жуық зымыранды атып түсірген. БАӘ Қорғаныс министрлігінің дерегі бойынша, қақтығыстың шиеленісу кезеңінен бері алты адам қаза тапты, оның төртеуі — бейбіт тұрғындар.

28 ақпаннан бастап АҚШ пен Израиль Иранға жаппай әуе соққыларын жасап келеді. Соның салдарынан Ислам Республикасының рухани көсемі аятолла Әли Хаменеи мен ирандық басшылықтың өзге де мүшелері қаза тапты. Бұған жауап ретінде Иран Израиль мен Парсы шығанағы елдерінің аумағына соққы беруде.

Бұдан бөлек, Тегеран Парсы шығанағы мен Үнді мұхитын жалғап тұрған, әлемдік мұнай саудасының бестен бірі өтетін Ормуз бұғазын коммерциялық кемелер үшін жабатынын жариялады. Бұл бүкіл әлемде жанармай бағасының шарықтауына себеп болды. 10 наурызда Иранның Ормуз бұғазын миналай бастағаны туралы хабар тарады. АҚШ ирандық 16 мина қойғыш катерді жойған.