Діннің жаңа бейнесі: Роботтар уағыз айтып, күнәларды кешіре алатын күн туды ма?

Қазіргі таңда діни жетекшілер мен сенушілер жасанды интеллектті (ЖИ) уағыз жазудан бастап, «Иса пайғамбармен сұхбаттасуға» дейінгі түрлі мақсаттарда қолдана бастады. Технологияның дінге енуі жаңа мүмкіндіктер ашқанымен, теологтар мен ғалымдар арасында үлкен пікірталас тудыруда, деп хабарлайды Reuters.

Уағыздар мен цифрлық көмекшілер

Калифорниядағы Friendship Baptist шіркеуінің пасторы Джастин Лестер өз уағыздарының негізінде арнайы GPT моделін жасап шығарған. Бұл құрал шіркеу мүшелеріне сабақтар дайындауға және рухани өсуге көмектеседі. Пастор ЖИ-ді рухани даму мен қауымдастықты нығайтудың маңызды құралы деп санайды.

Сонымен қатар кейбір сенушілер рухани сұрақтарға жауап іздеу үшін «TalkToHim» сияқты Иса пайғамбардың бейнесін имитациялайтын чат-боттарды қолдануда. Тіпті Швейцариядағы Әулие Петр капелласында жасанды интеллект арқылы жасалған «Иса аватары» орнатылып, ол келушілердің мойындауларын (исповедь) тыңдаған.

Алайда ЖИ-дің басты кемшілігі — ол деректерді өтіріктен құрастыра салуы мүмкін. Мысалы, ол діни ғалымдар айтпаған сөздерді «айтты» деп жалған дәйексөздер береді.

Ислам және буддизмдегі қателіктер

Цюрих университетінің профессоры Бет Синглер ЖИ-дің діни деректерді бұрмалау қаупін алға тартады. Мәселен, «Будда» чат-боты буддизмдегі төрт ақиқаттың орнына бес ақиқат бар деп қате ақпарат берген.

Кембридж университетінің ғалымы Якуб Чаудхари ислам діні тұрғысынан ЖИ-дің пәтуа беру мүмкіндігіне күмән келтіреді. Құран - Алланың өзгермейтін сөзі болғандықтан, ЖИ-дің түрлі деректерді араластырып, «халал» немесе «харам» туралы үкім шығаруы үлкен діни қателіктерге әкелуі мүмкін.

Дін өкілдерінің көпшілігі жасанды интеллект ақпарат алуға көмектескенімен, ол адам жанының мұқтаждығын - шынайы адамзаттық байланысты алмастыра алмайды деген пікірде.

 Раввин Фикслер айтқандай: «Діннің мақсаты - машиналарды адамға ұқсату емес, адамдардың барынша шынайы адам болып қалуына көмектесу».