BTS тобы жаңа «Arirang» альбомының трек-листін жариялады

Оңтүстіккореялық танымал BTS тобы «Arirang» атты жаңа альбомына енген әндер тізімін таныстырды. Billboard басылымының хабарлауынша, 20 наурызда жарық көретін бұл пластинка ұжымның соңғы алты жылдағы алғашқы толық форматты жұмысы болмақ.

Жаңа альбомға 14 композиция енген. Топ мүшелері трек-листі Instagram және Weverse желілерінде жариялады. Тізім «Body to Body» әнімен басталып, «Hooligans», «Aliens», «FYA», «2.0», «No. 29» және «SWIM» сияқты туындылармен жалғасады. Альбомның екінші бөлімінде «Merry Go Round», «NORMAL», «Like Animals», «they don’t know ’bout us’», «One More Night» және «Please» әндері бар.

Жанкүйерлер (Army) тізімдегі бір ерекшелікке бірден назар аударды: барлық әндердің атауы қызыл түспен жазылса, тек «SWIM» трегі қара түспен ерекшеленген. Көпшілік дәл осы ән альбомның басты синглы (title track) болады деп болжап отыр.

Әлемдік деңгейдегі продюсерлер

Альбомды жасауға музыка әлемінің майталмандары атсалысқан:

• Diplo

• Кевин Паркер (Tame Impala)

• Mike Will Made-It

• Райан Теддер (OneRepublic солисі)

Сонымен қатар топ мүшелері де авторлық құрамнан тыс қалмады. Топ лидері RM дерлік барлық әннің мәтінін жазса, Чонгук бірнеше композицияның туындауына үлес қосқан.

Альбомның атауы корей халқының символына айналған «Ариран» халық әніне сілтеме жасайды. BTS үшін бұл - бастауға қайта оралу мен тамырмен байланысты үзбеудің нышаны. Еске сала кетейік, топтың бұған дейінгі «Be» (2020) альбомы Billboard 200 чартында көш бастаған болатын.