Болгария Президенті отставкаға кететінін жариялады

Болгария Президенті Румен Радев өз қызметінен кететінін мәлімдеді. Халыққа арнаған үндеуінде ол отставкаға кету туралы өтінішін 20 қаңтарда беретінін атап өтті, деп хабарлайды informburo.

 «Осы тоғыз жыл ішінде президент лауазымында біз президент пен вице-президенттің ортақ мақсатқа бірігіп, тиімді әрі үйлесімді жұмыс істей алатынын көрсеттік. Илияна Йотова (Болгарияның вице-президенті) лайықты мемлекет басшысы болатынына сенімдімін», — деді Румен Радев.

Ол өз басқаруы кезеңінде Болгарияның 2020 және 2025 жылдары ірі наразылықтарды бастан өткергенін еске салды. Осы уақыт ішінде жеті рет уақытша үкімет тағайындалған.

«Бүгін мен сіздерге соңғы рет Болгария Президенті ретінде үндеу жолдап отырмын. Осы тоғыз жылда Болгария барлық тұрақты және уақытша үкіметтер тер төге жұмыс істеген еуропалық интеграция процесін аяқтады. Қазір біз Шенген аймағы мен еуроаймақтың мүшесіміз — бұл біздің қоғамның сонау 1990-шы жылдардың соңында алға қойған мақсаты болатын», — деді Радев.

Президент азаматтардан кешірім сұрап, сенім білдіргендері мен төзімділіктері үшін алғыс айтты. Сонымен қатар ол елдегі барлық саяси мәселелердің төркіні «сырттай демократия болып көрінгенімен, іс жүзінде олигархия тетіктерімен жұмыс істейтін кеселді басқару моделінде» жатқанын мәлімдеді.

«Болгария саясаты мемлекеттік институттардан тыс дамып жатыр. Көлеңкедегі «қуыршақ ойнатушылар» камералар алдында бой көрсетуден және Ұлттық жиналысқа бұйрық беруден тартынбайды. Олар премьер-министрдің көзінше үкімет атынан сөйлейді. Партияларды, банктерді, кәсіпорындар мен БАҚ-ты басып алады. Билікті саяси қарсыластарына қарсы сойыл ретінде пайдаланады», — деп тізіп өтті мемлекет басшысы.

Ол 2025 жылдың күзінде наразылыққа шыққан жастардың оған жігер бергенін атап өтті.

«Бұл біздің халқымыздың психологиясындағы бетбұрыс кезеңі болды. Сондықтан көнуді, немқұрайлылықты және тек жеке басын құтқаруға тырысуды тоқтататын уақыт келді. Бізді өткенге байлап қойған келіспеушіліктерді артқа тастауымыз керек. Дәл осы алаңдағы бірлік бізге алға бастар жолды көрсетті», — деді Румен Радев.

Reuters агенттігінің хабарлауынша, президенттің отставкаға кетуі күтілген шешім. Болгария соңғы төрт жылдағы сегізінші парламенттік сайлауға дайындалуда. Радев алдағы айларда өтетін сайлауға қатысу үшін өз саяси партиясын құруы мүмкін деп болжануда.

2025 жылдың қараша айының соңынан бастап Болгарияда наразылық шаралары өтті. Наразылық білдірушілер салық саясаты мен әлеуметтік жарналардың өсуіне қарсы шықты. Халық биліктің ауысуын және сыбайлас жемқорлықпен күресті күшейтуді талап етті. 11 желтоқсанда Болгария премьер-министрі Росен Желязков өз кабинетінің отставкаға кететінін ресми түрде жариялаған болатын.