$ 446.56 € 512.34 ₽ 5.3

BMW 58 мыңнан астам автокөлігін кері қайтарды

Редакция
26 ақпан 2026, 15:09
BMW 58 мыңнан астам автокөлігін кері қайтарды Сурет авторы: BMW.kz

АҚШ-та BMW компаниясы 58 713 автокөлігін кері қайтару туралы шешім қабылдады. Бұл туралы Reuters агенттігі хабарлады.

Мәліметке сәйкес, сапаны тексеру барысында аталған көліктерде кондиционер жүйесінің сымдар шоғыры (жгут) дұрыс орналастырылмағаны анықталған. Соның салдарынан қысқа тұйықталу қаупі туындауы мүмкін.

Кері қайтару науқанына BMW M5 Sportswagon, BMW M5 және BMW 750e xDrive модельдері ілінді. Компания өкілдерінің айтуынша, анықталған ақау жойылады. Қазіргі уақытқа дейін бұл техникалық кемшілікке байланысты жол-көлік оқиғалары немесе басқа да оқыс жағдайлар тіркелмеген.

Сонымен қатар бұған дейін Ford Motor Company АҚШ-та 412 774 дана Ford Explorer жол талғамайтын көлігін кері қайтаратынын мәлімдеді. Бұған артқы аспа бөлшектерінің зақымдану қаупі себеп болған. Реттеуші органның дерегінше, тартқыштардағы жарық көлікті басқаруды жоғалтуға әкелуі мүмкін. Дилерлер ақаулы бөлшектерді тегін ауыстырады.

Бұдан бөлек, Ford қосымша 40 655 автокөлікті кері қайтарады. Оның ішінде 24 690 гибридті кроссовер - Ford Escape PHEV және Lincoln Corsair PHEV (батареяға қатысты ықтимал ақауға байланысты), сондай-ақ 2025 жылы шығарылған 15 965 Ford Transit фургоны (тежегіш педалі торабындағы ақауға байланысты) бар.

Қазіргі уақытта аталған компаниялар анықталған техникалық кемшіліктерді жою жұмыстарын жүргізіп жатыр.

#BMW #АҚШ #Автокөлік #Кері шақыру #Автокөлікті тексеру #Техникалық ақау #Қысқа тұйықталу #M5 Sportswagon #M5 #750e xDrive #Ford Explorer #Ford Escape PHEV #Lincoln Corsair PHEV #Ford Transit #Автокөлік қауіпсіздігі #Автомобиль жаңалықтары #Автомобиль өндірушілер #Авто жаңалықтар #Автомобиль аудит #Авто нарық

Соңғы жаңалықтар