Алтын ба, әлде ойыншық па? Олимпиада медальдары бөлшектеніп жатыр

2026 жылғы Милан-Кортина Қысқы Олимпиадасының ұйымдастыру комитеті спортшылардың медаль сапасына қатысты шағымдарынан кейін тергеу жұмыстарын бастады. Бірнеше Олимпиада чемпионы салтанатты марапаттау рәсімінен кейін көп ұзамай жүлделерінің бөлшектеліп қалғанын BBC хабарлады.

АҚШ құрамасының алтын жүлдегерлері Бриизи Джонсон мен Алиса Лью алғашқылардың бірі болып наразылық білдірді. Тау шаңғысынан Олимпиада чемпионы атанған Бриизи Джонсон баспасөз мәслихатында сынып қалған медалін көрсетті. Оның айтуынша, медальдің бауы жалғап тұратын темір бөлшек босап, жүлде жерге түсіп қалған.

Осындай жағдайға мәнерлеп сырғанаудан командалық жарыста алтын алған Алиса Лью де тап болды. Ол әлеуметтік желідегі парақшасында медалін екі бөлек ұстап тұрған видеосын жариялап, жағдайды келемежге айналдырды. Сондай-ақ, биатлоннан қола жүлде алған Германия құрамасы да жеңісті тойлау кезінде медальдарының шашылып қалғанын видеоға түсіріп алған.

Милан-Кортина 2026 Ойындарының операциялық директоры Андреа Франчизи бұл жағдайдан хабардар екенін және мәселенің мән-жайын анықтап жатқандарын мәлімдеді:

«Біз жағдайды толық бақылауда ұстап отырмыз. Бұл - спортшылар үшін ең маңызды сәт, сондықтан медальдардың мінсіз болғанын қалаймыз. Біз бұл мәселеге барынша назар аударатын боламыз», - деді Франчизи.

Әзірге спортшыларға жаңа медальдар берілетіні немесе берілмейтіні туралы ресми ақпарат жоқ. АҚШ Олимпиада және Паралимпиада комитеті ұйымдастырушылардың нақты шешімін күтіп отыр.

Айта кетейік, Олимпиада медальдарының сапасына қатысты мәселелер бұрын да болған. Мәселен, 2025 жылғы ақпандағы мәлімет бойынша, 2024 жылғы Париж Олимпиадасында берілген 220-дан астам медаль тозуына байланысты ауыстыруға жіберілген. Сол кезде де спортшылар жүлделерінің түсі оңып, қажалып жатқанына шағымданған болатын.