Әлем миллиардерлері салықтан 3,5 триллион доллардан астам қаржы жасырып отыр

Oxfam қайырымдылық ұйымдарының бірлестігі «Панама архиві» жарияланғанына 10 жыл толуына орай жаңа есеп шығарды. Мәліметтерге сүйенсек, әлемдегі ең бай адамдар офшорлық аймақтар мен декларацияланбаған шоттарда шамамен 3,55 триллион доллар қаражатты жасырып ұстап отыр.

Бұл сома Францияның ішкі жалпы өнімінен (3,16 трлн доллар) асып түседі және әлемдегі ең аз дамыған 44 елдің жиынтық ІЖӨ-сінен екі есе көп. Зерттеу авторлары офшордағы барлық ақшаның 80 пайызы немесе 2,84 триллион доллары жер шарындағы ең дәулетті адамдардың небәрі 0,1 пайызына тиесілі екенін атап өтті. Бұл капитал адамзаттың ең кедей бөлігін құрайтын 4,1 миллиард тұрғынның жиынтық байлығынан да асып түседі.

Oxfam салықтан жалтарумен күресу үшін әлемдегі ең бай адамдардың 1 пайызына салынатын салықты көбейтуді және аса ірі байлыққа арнайы салық енгізуді ұсынады. Сонымен қатар халықаралық ынтымақтастықты нығайту арқылы қаржылық ашықтыққа қол жеткізу бастамасы көтерілді.

Ұйым сарапшыларының айтуынша, 2016 жылдан бері офшорлық активтердің жалпы көлемі 13,25 триллион долларға дейін өскенімен, салық салынбайтын үлес едәуір қысқарған. Бұл көрсеткіш қазіргі уақытта әлемдік ІЖӨ-нің 3,2 пайызын құрап, тұрақталған.

Салық салынбайтын офшорлық қаражат үлесінің азаюына 2016-2017 жылдары іске қосылған Салық ақпаратымен автоматты түрде алмасу жүйесі (AEOI) оң ықпал еткен. 2025 жылдың наурызындағы жағдай бойынша бұл стандартқа әлемнің 126 елі мен юрисдикциясы қосылып үлгерді. Бұл халықаралық қаржы жүйесіндегі ашықтықты арттыруға мүмкіндік берді.