АҚШ Украинаға қауіпсіздік кепілдігін беруге дайын – Трамп

АҚШ президенті Дональд Трамп Еуропа басшыларымен және Украина президенті Владимир Зеленскиймен өткен келіссөздерде Вашингтон белгілі бір шарттар орындалса, Киевке қауіпсіздік кепілдігін беруге дайын екенін мәлімдеді. Бұл туралы 13 тамызда Politico басылымы үш дереккөзге сілтеме жасап хабарлады.

Келіссөздер Германия ұйымдастырған бейнеконференция аясында өтті. Оның мақсаты – 15 тамызда Трамп пен Ресей президенті Владимир Путиннің саммиті алдында АҚШ пен Еуропаның ұстанымдарын келісу.

Дереккөздердің айтуынша, АҚШ Украинаға болашақта Ресей тарапынан болуы мүмкін агрессияның алдын алу үшін белгілі бір қолдау көрсетуге әзір, бірақ бұл тек бітімге қол жеткізілген жағдайда жүзеге асады. Бір дереккөз Трамптың мұндай міндеттемені НАТО аясында емес, жеке форматта қабылдайтынын атап өтті.

Британдық шенеуніктің мәліметінше, Трамп қауіпсіздік кепілдіктерін түпкілікті келісімнің бір бөлігі ретінде қарастыру қажет екенін айтқан. Сонымен бірге ол АҚШ Украинаға тікелей қару-жарақ немесе әскер жібермейтінін, бірақ Еуропаға қару сату арқылы Киевті жанама қолдауды жалғастыруы мүмкін екенін жеткізген.

Ақ үй бұл ақпаратқа түсініктеме берген жоқ.