АҚШ-тың күтпеген шешімі: Ресейлік мұнайға салынған «құлып» ашылды ма?

Уашингтон Үндістанның мұнай өңдеуші компанияларына теңіздегі танкерлерде тұрған ресейлік шикізатты сатып алу үшін 30 күндік жеңілдік кезеңін ұсынды.

АҚШ Қаржы министрі Скотт Бессенттің мәлімдеуінше, бұл шешім әлемдік энергетика нарығындағы тұрақсыздыққа байланысты қабылданып отыр. Министр бұл шараның мақсаты мен шарттарын өзінің X (бұрынғы Twitter) әлеуметтік желісіндегі парақшасында түсіндіріп өтті.
Қаржы министрлігі Үндістанға ресейлік мұнаймен операциялар жүргізуге 30 күндік ерекше рұқсат берді. Рұқсат тек қазіргі уақытта теңіздегі танкерлерде тиелген мұнайға ғана қатысты. Бұл Ресей үкіметіне айтарлықтай қаржылық пайда әкелмейтін қысқа мерзімді шара ретінде сипатталды.

Аймақтағы саяси тұрақсыздық мұнай жеткізу тізбегін бұзып, нарықта тапшылық тудырды. Уашингтон Үндістанға рұқсат беру арқылы мұнай бағасының шарықтап кетуіне жол бермеуді көздейді.

 «Бұл шара әлемдік энергетикалық нарыққа түскен қысымды төмендетуге бағытталған. Сонымен қатар, біз Үндістан алдағы уақытта АҚШ-тан келетін энергия ресурстарының көлемін арттырады деп үміттенеміз», - деп атап өтті Скотт Бессент.

Бұған дейін мұнай бағасы соңғы екі жылдағы ең жоғары көрсеткішке жетіп, барреліне $84,9 құраған болатын. Таяу Шығыстағы қақтығыстар мен Ормуз бұғазы арқылы тасымалдау қаупінің артуы отын құнының қымбаттауына негізгі себеп болып отыр.