АҚШ пен Израиль Иранға әскери соққы жасады

Әлемдік ақпарат құралдары Таяу Шығыста ауқымды соғыс қимылдарының басталғанын хабарлады. АҚШ пен Израиль Иран аумағындағы стратегиялық нысандарды нысанаға алды.

АҚШ Президенті Дональд Трамп сенбі күні жасаған бейнеүндеуінде Иран режимі тарапынан төнген «тікелей қауіпті» жою мақсатында «ауқымды жауынгерлік операциялардың» басталғанын жариялады.

 «Операция өте ауқымды және ол жалғасуда. Біз ирандық зымырандарды жою және Иранның ядролық қару жасауына жол бермеу үшін жойқын күш қолданамыз», - деді АҚШ басшысы.

Трамп сондай-ақ Иран азаматтарына қайрылып, «азаттық сағаты жақын» екенін айтып, оларды билікті басып алуға шақырды.

Израиль Премьер-министрі Биньямин Нетаньяху бұл шабуылдарды Иран режимінен келетін «экзистенциалды қауіпті жоюға» бағытталған «превентивті» алдын алу шарасы деп атады.

Израиль Қорғаныс армиясы (ЦАХАЛ) Иран тарапынан «зымырандар нөпірі» атылғанын және оларды қағып түсіру жұмыстары жүріп жатқанын хабарлады. Қазіргі уақытта Израиль өз әуе кеңістігін толықтай жапты.

Иран астанасы Тегеранда және бірнеше ірі қалаларда жарылыс дыбыстары естіліп, көкжиектен қою түтін көрінген. Иран билігі де әуе кеңістігін жауып, қорғаныс шараларына көшті.

Reuters агенттігінің мәліметінше, Иранның жоғарғы көшбасшысы аятолла Әли Хаменеи қауіпсіз жерге көшірілген.
Шиеленістің себебі

Бұл әскери қимылдар жұма күні АҚШ пен Иран арасындағы ядролық бағдарлама бойынша келіссөздердің нәтижесіз аяқталуынан кейін басталды. Дональд Трамп келіссөздер барысына көңілі толмайтынын ашық білдірген болатын.