АҚШ пен Иран соғысы: Еуропа қай тарапты қолдайды?

Израиль мен АҚШ-тың Иранға қарсы әскери операциясы күшейген тұста Еуропа елдерінің бұл қақтығысқа қатысты нақты ұстанымы әлі толық айқындалған жоқ. Еуроодақ пен Ұлыбритания халықаралық құқықты сақтауға шақырып, Ирандағы аятолла режимін сынға алғанымен, соғысқа қатысты бірыңғай позиция қалыптастыра алмады, деп хабарлайды DW.com.

Сарапшылардың айтуынша, Еуропа әзірге қорғаныс стратегиясын ұстанып, қақтығысқа тікелей әскери араласудан аулақ болуға тырысып отыр. Дегенмен Иран дронының Кипрдегі британ әскери базасына шабуыл жасауы Еуропада алаңдаушылық туғызды. Осыдан кейін Италия, Грекия, Франция және Нидерланд Кипрге әскери-теңіз күштерін жіберді.

Германияның Сыртқы саясат қоғамының сарапшысы Корнелиус Адебардың айтуынша, егер Иран Еуропа елдерінің біріне шабуыл жасаса, ЕО мемлекеттері қорғаныс шараларын қолдануға дайын. Алайда АҚШ-тың Иранға қарсы операциясын толық қолдау мәселесінде Еуропа ішінде пікірлер әртүрлі.

Соған қарамастан бірде-бір еуропалық мемлекет соғысқа ашық қатысып, АҚШ пен Израиль жағында белсенді рөл атқармайды деген болжам бар. Дегенмен Ұлыбритания, Германия және Франция белгілі бір шектеулермен АҚШ әскери күштеріне өз базаларын пайдалануға рұқсат берген.

Сарапшылар бұл шешімдерді Вашингтон қысымымен жасалған компромисс деп бағалайды. Сонымен қатар соғыс Еуропаға экономикалық тұрғыдан да әсер етуі мүмкін. Энергия бағасының қымбаттауы және босқындар легінің артуы ықтимал.

ЕО-ның сыртқы саясат жөніндегі өкілі Кая Каллас әзірге миграциялық қысым байқалмайтынын айтқанымен, қақтығыс ұзаққа созылса, Еуропа жаңа қауіптерге дайын болуы керек екенін ескертті.