АҚШ БҰҰ алдындағы 4 миллиард долларлық қарызының бір бөлігін ғана өтеді

Америка Құрама Штаттары Біріккен Ұлттар Ұйымына (БҰҰ) тиесілі 4 миллиард доллардан астам қарызының тек 160 миллион долларын төледі. Бұл туралы БҰҰ өкілі бейсенбі күні мәлімдеді, деп хабарлайды Reuters.

Төлем Президент Дональд Трамптың БҰҰ беделіне нұқсан келтіруі мүмкін деп есептелетін «Бейбітшілік кеңесі» (Board of Peace) бастамасының алғашқы отырысымен тұспа-тұс келді.

БҰҰ мәліметінше, ақпан айының басындағы жағдай бойынша АҚШ-тың ұйым алдындағы берешегі келесідей:

• 2,19 млрд доллар - БҰҰ-ның тұрақты бюджетіне (бұл бүкіл әлем елдері қарызының 95%-нан астамы);
• 2,4 млрд доллар - бітімгершілік миссияларына;
• 43,6 млн доллар - БҰҰ трибуналдарына.

Дональд Трамп «Бейбітшілік кеңесінің» ашылуында Вашингтон ұйымды нығайту үшін қаржы беретінін айтты.

«Біз оларға қаржылай көмектесеміз және БҰҰ-ның өміршеңдігін қамтамасыз етеміз. Меніңше, БҰҰ-ның әлеуеті өте зор, бірақ ол әзірге бұл үмітті ақтаған жоқ», - деді АҚШ президенті.

Трамп өткен айда құрған бұл кеңес басында Газа секторындағы соғысты тоқтату және аймақты уақытша басқару жоспарының бір бөлігі ретінде ұсынылған болатын. Кейінірек Трамп кеңестің ауқымын кеңейтіп, жаһандық қақтығыстармен айналысатынын мәлімдеді.

БҰҰ сарапшылары бұл кеңестің құрылымын «отаршылдық жүйеге» ұқсатып, онда Палестина өкілдерінің жоқтығын айыптады. Жаһандық Оңтүстік елдері мен АҚШ-тың батыстағы негізгі одақтастары Трамптың төрағалығымен өтетін бұл кеңеске қосылуға асығар емес.

Бейсенбі күнгі «Бейбітшілік кеңесінің» отырысына БҰҰ-дан ешбір өкіл қатысқан жоқ.
Еске сала кетсек, Трамп әкімшілігі бұған дейін БҰҰ-ның ондаған агенттіктерінен шығып, ерікті қаржыландыруды айтарлықтай қысқартқан болатын.