АҚШ әскеріне бұрын-соңды болмаған қаржы бөлінбек

АҚШ президенті Дональд Трамп 2027 жылға арналған елдің әскери бюджеті 1,5 трлн долларды құрауы тиіс екенін мәлімдеді. Бұл туралы ол 7 қаңтар күні Truth Social әлеуметтік желісіндегі парақшасында жазды.

Бұл сома Конгресс 2026 жылға бекіткен 901 млрд долларлық қорғаныс бюджетінен едәуір жоғары. Бұл жайтқа Reuters агенттігі назар аударды.

Трамптың айтуынша, мұндай шешім сенаторлармен, конгрессмендермен және атқарушы билік өкілдерімен жүргізілген «ұзақ әрі күрделі келіссөздерден» кейін қабылданған. Ақ үй басшысы бұл қадам АҚШ-қа «армандағы қарулы күштерді» қалыптастыруға және елдің қауіпсіздігін нығайтуға мүмкіндік береді деп санайды. Оның пікірінше, әскери шығындарды арттыру кедендік баж салығы есебінен жүзеге асады. Сонымен қатар президент мемлекеттік қарызды қысқарту және орташа табысы бар америкалықтарға төлемдер жасау мүмкіндігі сақталатынын айтты.

Дегенмен ұсынылған бюджет күшіне енуі үшін АҚШ Конгресі тарапынан мақұлдануы қажет. Reuters дерегінше, қазіргі таңда республикашылдар Сенат пен Өкілдер палатасында аз ғана басымдыққа ие.

Бүгінде АҚШ әлемдегі басқа елдерге қарағанда қорғаныс саласына ең көп қаржы бөлетін мемлекет саналады. Бұл мәліметті AFP агенттігі де растады. Бұған дейін Дональд Трамп НАТО-дағы одақтастардың адалдығына күмән келтірген болатын.

Politico басылымының жазуынша, бюджеттегі күрт өсім әуе қорғанысына арналған «Алтын күмбез» жобасы мен Әскери-теңіз күштерін жаңғыртуға бағытталған «Алтын флот» секілді қымбат бағдарламалармен байланысты. Аталған жобалар аясында жаңа буын әскери кемелерін жасау жоспарланып отыр.

Айта кетейік, 2026 қаржы жылына арналған АҚШ-тың қорғаныс бюджеті 2025 жылғы 17 желтоқсанда қабылданған. Құжатта әскери қызметкерлердің жалақысын 3,8%-ға арттыру, жаңа әскери техникалар сатып алу және Қытай мен Ресейге қатысты бәсекеге қабілеттілікті күшейту шаралары қарастырылған.