АҚШ әскери операция басталғанын мәлімдеді

АҚШ соғыс министрі Пит Хегсет Америка Құрама Штаттарының Батыс жартышардағы есірткі картельдеріне қарсы жаңа әскери операция бастағанын мәлімдеді. Операция «Southern Spear» («Оңтүстік найза») деп аталады.

Министрдің айтуынша, бұл миссияның мақсаты – АҚШ аумағын қорғау, «есірткі террористерін» жою және америкалықтарды есірткі қауіпінен қорғау.

«Батыс жартышар – бұл Американың көршілес аумағы, және біз оны қорғаймыз», – деп жазды Хегсет X әлеуметтік желісінде.

Операцияны арнайы құрылған Southern Spear бірлескен жедел тобы мен АҚШ Қарулы күштерінің Оңтүстік қолбасшылығы (Southcom) басқарады. Бұған дейін Southcom өз қарамағына Gerald R. Ford ұшақ тасығышын алған болатын. Ол Пуэрто-Рикода орналасқан әскери кемелер мен сүңгуір қайықтарға және ұшақтарға қосылады.

Қыркүйек айынан бері америкалық әскери кемелер халықаралық суларда Венесуэла есірткі картельдерімен байланысы бар деп күдіктелген кемелерге соққы беріп келеді. Сонымен қатар АҚШ Венесуэла жағалауында әскери топ орналастырып, Пуэрто-Рикода жойғыш ұшақтарын дислокациялаған.

The New York Times басылымының хабарлауынша, Вашингтонда қақтығыстың ушығуының бірнеше нұсқасы қарастырылған. Олардың бірі – Венесуэла президенті Николас Мадуроны күшпен биліктен кетіру мүмкіндігі.