АҚШ 24 сағат ішінде Иранға соққы беруі мүмкін

Басылымның мәліметінше, Иран көршілес елдерге ескерту жасап, егер АҚШ тарапынан шабуыл жасалса, олар өз аумағында орналасқан американдық әскери базаларға соққы беретінін мәлімдеген, деп хабарлайды Reuters. Осыдан кейін Вашингтон Таяу Шығыстағы базаларынан әскерилердің бір бөлігін шығару туралы шешім қабылдады.

Атап айтқанда, Қатар аумағындағы АҚШ-тың «Әл-Удейд» авиабазасындағы кейбір әскерилерге 14 қаңтар кешке дейін базадан кету туралы нұсқау берілген. Агенттік дереккөздерінің бірі бұл процестің эвакуация емес, жай ғана әскери күштерді «қайта орналастыру» екенін атап өтті.

«Әл-Удейд» авиабазасы — АҚШ-тың Таяу Шығыстағы ең ірі әскери базасы. Онда шамамен 10 мың американдық әскери қызметші орналасқан. 2025 жылғы 23 маусымда Тегеран АҚШ-тың Ирандағы Исфахан, Фордо және Натанздағы ядролық нысандарына жасаған шабуылына жауап ретінде осы базаға соққы берген болатын. Сол кезде Трамп ұшырылған 14 зымыранның 13-і атып түсірілгенін, ал біреуі қауіп төндірмегенін айтқан еді. Ал Қатар авиабаза бағытында жеті зымыран атылғанын, оның біреуі база аумағына құлағанын хабарлаған.

13 қаңтар күні Трамп ирандық шерушілерге үндеу тастап, оларды мемлекеттік мекемелерді басып алуға шақырды және «көмек жолда келе жатқанын» айтты. Журналистермен әңгімелесу кезінде АҚШ Президенті бұл сөздерімен нені меңзегенін нақтыламады, бірақ американдық азаматтарды Ираннан эвакуациялау мәселесін қарастыру қажеттігін білдірді. CBS News телеарнасына берген сұхбатында Трамп Тегеранға қатысты түпкі мақсаты — «жеңіс» екенін айтты, бірақ бұл ұғымға түсініктеме бермеді.

Басылымның израильдік шенеунікке сілтеме жасап хабарлауынша, 12 қаңтарда Израиль Премьер-министрі Биньямин Нетаньяхудың қауіпсіздік кабинетіне «Иран режимінің құлауы немесе АҚШ-тың араласу ықтималдығы» туралы мәлімет берілген.

Ирандағы жаппай наразылық шаралары 2025 жылғы желтоқсан айының соңынан бері жалғасып келеді. Шерулер елдегі терең экономикалық дағдарыс аясында басталды. Жыл соңына қарай инфляция деңгейі 42,2%-ға жетіп, ұлттық валюта — иран риалы рекордтық деңгейде құнсызданып, 1 доллар үшін 1,42 миллион риалға дейін түсіп кетті.

Наразылық білдірушілер үкіметтің және Ислам Республикасының Жоғарғы Көшбасшысы аятолла Әли Хаменеидің отставкаға кетуін талап етуде. Наразылық акциялары ондаған қаланы қамтыды. Бүкіл ел бойынша интернет өшірілгендіктен, қаза тапқандар туралы ақпаратты жинау мен растау қиындап отыр. Құрбандардың шерушілер арасында да, қауіпсіздік күштерінің қатарында да бар екені айтылуда.

Естеріңізге сала кетейік, бұған дейін Иран өз әуе кеңістігін барлық ұшақтар үшін жапқан болатын. Тегеран таратқан ақпаратқа сәйкес, шектеулер 15 қаңтар күні сағат 00:45-те күшіне еніп, сол күні сағат 8:00-ге дейін жалғасады деп жоспарланған, бірақ соңғы мәліметтер бойынша, тыйым әлі де өз күшінде қалып отыр.