Ақ үйге барған еуропалықтар не қалайды?

19 тамыз күні Ақ үйде өткен жиында Франция президенті Эммануэль Макрон Дональд Трамп, Владимир Путин және Владимир Зеленский арасындағы ықтимал үшжақты кездесуге Еуропа көшбасшыларын да қосу қажеттігін айтты.

«Менің ойымша, енді төртжақты кездесу қажет. Себебі біз қауіпсіздік кепілдіктері туралы айтқанда, тұтас Еуропа құрлығының қауіпсіздігі туралы айтып отырмыз», – деді Макрон.

АҚШ президенті Дональд Трамп әзірге бұл идеяны қолдайтыны күмәнді, алайда Макронның сөзі қазіргі келіссөздердің тек Украина үшін ғана емес, Еуропа үшін де маңыздылығын көрсетті.

НАТО бас хатшысы Марк Рютте Трамптың Украинаға қауіпсіздік кепілдіктерін беруге дайын екендігін «үлкен жетістік» деп бағалады.

«Бұл бәрін өзгертеді. Сіздің дайын екеніңіз – үлкен қадам», – деді ол Зеленский мен еуропалық көшбасшылар қатысқан көпжақты кездесуде.

Осыған дейін Трамп Овал кабинетте Зеленскиймен бірге сөйлегенде, АҚШ әскерін Украинаға жіберу мүмкіндігін бірден жоққа шығармаған еді.

«Бұл туралы хабарлаймыз, бәлкім бүгін кешке», – деген болатын ол.

Германия канцлері Фридрих Мерц те Ақ үйдегі кездесуде «күрделі келіссөздерге жол ашылды» деп атап өтті. Оның пікірінше, Еуропа көшбасшылары атысты тоқтатпай тұрып жаңа кездесудің өтуін елестете алмайды.

Еурокомиссия басшысы Урсула фон дер Ляйен әрбір баланың отбасына оралуы тиіс екенін айтып, әділетті әрі тұрақты бейбітшілік үшін күш біріктіруге шақырды.

Италия премьер-министрі Джорджия Мелони қауіпсіздік кепілдіктері кез келген бейбіт келісімнің басты шарты екенін атап өтсе, Ұлыбритания премьері Кир Стармер мәселе тек Украина емес, Еуропа мен Ұлыбритания қауіпсіздігіне қатысты екенін айтты.

Финляндия президенті Александр Стубб:
– «Біз 1944 жылы шешім таптық, енді 2025 жылы да Ресейдің басқыншылық соғысын тоқтатып, әділетті әрі тұрақты бейбітшілікке қол жеткізе аламыз», – деді.

Владимир Зеленский кездесу барысында:
– «Барлығымыз бұл соғысты тоқтатқымыз келеді. АҚШ-тың қауіпсіздік кепілдіктерін беруге дайындығы – өте маңызды сигнал. Бұл Трамппен болған ең жақсы әңгімеміз болды. Украина үшжақты кездесуге қуана қатысар еді», – деп мәлімдеді.

Ал Дональд Трамп өз кезегінде күні сәтті өткенін айтып, Украинадағы соғысты тоқтату үшін Ресей мен Украинамен бірлескен келісімге келу мүмкін екенін жеткізді.

«Біз бірге агрессияны тоқтату бойынша келісімге қол жеткіземіз. Сондай-ақ аумақтық айырбас мәселесін де талқылауымыз керек», – деді ол.