"1,5 трлн доллар бере аласыз ба?": Трамп Сауд Арабия ханзадасынан тағы ақша сұрады

АҚШ президенті Дональд Трамп 19 қараша күні Сауд Арабиясының тақ мұрагері Мұхаммед бин Салман Әл Саудқа ел экономикасына салынатын инвестиция көлемін 1,5 триллион долларға дейін арттыруды ұсынғанын мәлімдеді. Бұл туралы ол АҚШ–Сауд Арабиясы инвестициялық форумында сөйлеген сөзінде айтты.

Трамптың айтуынша, ол ханзададан тағы да көбірек қаржы салуды сұраған.

«Біз суретке түсіп жатқан сәтте мен одан: “Инвестиция көлемін 1,5 триллион долларға дейін арттыра аласыз ба?” деп сұрадым. Ол ойланып көремін деді», – деді АҚШ президенті.

Президент ханзаданың нақты жауабын ашып айтқан жоқ, бірақ АҚШ бұл бағытта белгілі бір нәтижеге қол жеткізетініне сенім білдірді.

Бұған дейін Трамп Мұхаммед бин Салманмен кездесу барысында Сауд Арабиясы АҚШ экономикасына 600 миллиард доллар инвестиция салуға келіскенін, ал бұл сома 1 триллион долларға дейін ұлғаюы мүмкін екенін айтқан болатын. Сондай-ақ ол АҚШ-тың Сауд Арабиясына жаңа буын микрочиптерін жеткізуге лицензия беру мәселесін қарастырып жатқанын атап өтті.

Айта кетейік, 18 қараша күні Ақ үйде Трамп пен бин Салман екі ел арасындағы қорғаныс саласындағы 80 жылдық ынтымақтастықты нығайту және Таяу Шығыстағы қауіпсіздік механизмдерін күшейтуге бағытталған келісімге қол қойған болатын. Бұл келісімдер АҚШ-тың аймақтық қауіпсіздік саласындағы жетекші рөлін күшейтеді деп күтіледі.