Илон Маск төрт секундта әлемдегі орташа жылдық табысқа тең қаржы табады

Әлемдегі миллиардерлердің жиынтық байлығы 2025 жылы 2,5 трлн АҚШ долларына өсіп, тарихи рекордқа жетті. Бұл туралы қайырымдылық ұйымдарын біріктіретін Oxfam жыл сайынғы баяндамасында мәлімдеді. Құжат Дүниежүзілік экономикалық форум аясында, 19 қаңтарда жарияланған.

Oxfam есебіне сәйкес, миллиардерлердің жиынтық дәулеті 2020 жылдың наурызынан бері 81 пайызға артып, 18,3 трлн долларды құраған. Ұйым дерегінше, әлемдегі ең бай адам – Илон Маск төрт секундта әлемдегі орташа жылдық табысқа тең ақша табады.

Сонымен қатар баяндамада әлем халқының жартысына жуығы кедейлікте өмір сүріп жатқаны атап өтілген. Бұл топтың үлесіне жаһандық байлықтың небәрі 0,52 пайызы ғана тиесілі. Ал әлемдегі ең бай 1 пайыз адамзат байлығының 43,8 пайызына иелік етеді.

Oxfam-ның Германиядағы бөлімшесінің төрайымы Шарлотта Бекердің айтуынша, қазіргі жағдай алаңдатарлық.

«Біз миллиардерлер дәуірінде өмір сүріп жатырмыз. Бұл – әлем үшін жақсы жаңалық емес», – деді ол.

Бекер әсіресе аса бай топтардың экономикалық ықпалының саяси билікке айналуы демократияға қауіп төндіретінін атап өтті. Оның пікірінше, бұл үрдіс Дональд Трамптың саясаты арқылы айқын көрінеді.

«Байлардың мүддесіне бейімделген саясат әлеуметтік теңсіздікті одан әрі тереңдете түседі», – деді ол.

Oxfam баяндамасы әлемдегі байлық теңсіздігі жылдан-жылға ушығып келе жатқанын және оның әлеуметтік әрі саяси салдары барған сайын күшейіп бара жатқанын көрсетеді.