Венгрияның жаңа премьері өзінің және шенеуніктердің жалақысын екі есе қысқартпақ

Венгрияның жаңа премьер-министрі Петер Мадьяр мемлекеттік сектор шығындарын едәуір қысқартуды көздеп отырғанын хабарлады. RTL Венгрия телеарнасына берген сұхбатында ол сайлаудағы жеңісінен кейін өз жалақысын екі еседен көп мөлшерде төмендетуді жоспарлап отырғанын айтты.  

Премьер-министрдің айтуынша, ол бұрынғы үкімет басшысы Виктор Орбан иеленген қосымша төлемдерден бас тартып, тек премьер-министр және депутат ретінде қарастырылған жалақыны ғана алмақ. Оның жалпы көлемі айына шамамен 3,8 млн форинт брутто құрайды. Бұл шамамен 10,5 мың еуроға немесе 5,7 млн теңгеге тең. 

Жалақыны азайту министрлерді, мемлекеттік хатшыларды, депутаттарды, әкімдерді және ұлттық компаниялар жетекшілерін де қамтиды. Мадьярдың пікірінше, күрделі кезеңде саясаткерлер пайда табуды емес, елге қызмет етуді ойлауы тиіс. 

Сонымен қатар үкімет депутаттарға берілетін өтемақыларды да азайтпақ. Бұған дейін парламент мүшелері көлікке, тұрғын үйге және қызметкерлер еңбекақысына ай сайын 7 млн форинтке дейін ала алатын. Енді бұл шекті сома 5 млн форинттен төмен деңгейге дейін қысқартылуы мүмкін. Үкімет басшысының мәліметінше, енгізілетін өзгерістер бюджетке шамамен 50 млрд форинт, яғни 139 млн еуроға жуық қаражатты үнемдеуге мүмкіндік береді. 

Қазір Венгрияда орташа айлық жалақы шамамен 640 мың форинт бруттоны құрайды. Бұл – 1630 еуро немесе 900 мың теңгеге жуық сома.  Осыдан жоғары қызметтегі шенеуніктердің кірісі қарапайым азаматтардың орташа жалақысынан айтарлықтай көп болғанын көруге болады.

Жарылқасын Шұғыла