Ұлыбритания соғысқа дайындала бастады

Ұлыбритания үкіметі болашақта ел аумағында әскери қақтығыстың орын алу мүмкін екенін жоққа шығармайды және мемлекет осындай жағдайға дайындалуы қажет деп есептейді. Бұл туралы 24 маусымда жарияланған Ұлыбританияның жаңартылған ұлттық қауіпсіздік стратегиясында айтылған.

Құжат авторлары соңғы жылдардағы жаһандық жағдайдағы «драмалық өзгерістерге» алаңдаушылық білдіреді. Олардың ішінде Ресейдің Украинаға қарсы соғысы, Мәскеудің басқа да территориялық амбициялары, гибридтік соғыстың құралына айналған заңсыз көші-қон, Таяу Шығыс пен Үнді-Тынық мұхиты аймағындағы қақтығыстар, кибершабуылдар мен интернеттегі зиянды және заңсыз контенттің таралуы көрсетілген.

Ресей мен Иран «Қарсыласу» тарауында аталады

Стратегияның «Қарсыласу» бөлімінде Ресей мен Иранның әрекеттері арнайы атап өтіледі. Онда Ресейдің Украинаға қарсы соғыс бастаған кезде НАТО елдерінде, соның ішінде Ұлыбританияда да кибершабуылдар мен диверсиялар жасағаны айтылған. Сонымен қатар құжатта Мәскеудің ядролық қауіп төндіру риторикасының күшейгені атап өтілген. Ал Иранның әрекеттері «Ұлыбританиядағы режим сыншыларын үнсіз қалдыруға бағытталған дұшпандық әрекет» ретінде сипатталған.

«Көп жылдан бері алғаш рет Ұлыбритания аумағы тікелей қауіпке, соның ішінде әскери сипаттағы қауіпке ұшырауы мүмкін. Әсіресе логистика мен энергетика инфрақұрылымы нысана болуы ықтимал», – делінген құжатта.

Қытайға қатысты алаңдаушылық та бар

Ұлыбритания Қытайдың Ресейдің әскери-өнеркәсіптік кешенін қолдағанын және өзінің әскери әлеуетін арттырып жатқанын атап өтеді. Ел үкіметі Қытаймен қарым-қатынаста «сенімділік пен дәйектілік» принципін ұстануға уәде берді.

Азаматтарды соғысқа дайындыққа үйрету басталады

Құжатта ұсынылған шаралар қатарында:

• халықты әскери қауіп төнген жағдайда төзімділікке үйрету,

• бизнес және ғылыми ортамен киберқауіпсіздікті күшейту,

• интернеттегі заңсыз контенттің таралуына жол бермеу,

• басқа елдермен бірлескен жаттығулар өткізу (соның ішінде соғыс пен пандемия сияқты сценарийлерге дайындық) бар.

Ұлыбритания қорғанысқа шығынды арттырады және АҚШ-тан ядролық қару тасығыш ұшақтар сатып алады

Ұлттық қауіпсіздік стратегиясы жарияланар алдында Ұлыбритания премьер-министрі Кир Стармер елдің қорғаныс шығындарын 2035 жылға қарай ЖІӨ-нің 5%-ына дейін арттыратынын мәлімдеді. Бұл шешім НАТО-ның жаңа ұсыныстарына сай қабылданды.

Стармер сондай-ақ Лондонның АҚШ-тан кемінде 12 ядролық қару тасығыш F-35A жойғыш ұшағын сатып алатынын мәлімдеді. Ұлыбритания қазіргі таңда тек сүңгуір қайықтар арқылы ғана ядролық қару қолдана алады. Жаңа ұшақтар мен B61 термоядролық бомбалары елдің ядролық әлеуетін кеңейтуге мүмкіндік береді.