«Түнде балаларды тістейді»: Газадағы босқындар лагерінде егеуқұйрықтар қаптап кетті

Газа секторындағы уақытша лагерлерде өмір сүріп жатқан босқындар егеуқұйрықтар мен зиянкес паразиттердің жаппай қаптауынан зардап шегіп жатыр. Кеміргіштер адамдарды ұйқы кезінде тістеп, мүліктерін бүлдіріп, қауіпті аурулардың таралуына себеп болып отыр, деп хабарлады Reuters.

Қазіргі уақытта 2 миллионнан астам тұрғын үйлерін тастап шығуға мәжбүр болып, қираған ғимараттар мен жол бойындағы палаталарда тұрып жатыр. Тұрғындардың айтуынша, егеуқұйрықтар тіпті балаларға шабуыл жасап, қол-аяқтарын жарақаттаған. Кейбір отбасы кеміргіштерден қорғану үшін түнде кезекпен ұйықтауға мәжбүр.

Жағдайдың күрделілігі:

• Эпидемия қатері: «Аш-Шифа» ауруханасының бас дәрігері Мохаммед Абу Селмия жазда күн ысыған соң жағдайдың ушығатынын ескертті. Оның айтуынша, лептоспироз және тіпті оба сияқты қауіпті инфекциялардың таралу қаупі жоғары.

• Статистика: Дүниежүзілік денсаулық сақтау ұйымының (ДДСҰ) мәліметінше, 2026 жылдың басынан бері Газада кеміргіштер мен паразиттерге байланысты 17 мыңға жуық инфекциялық жағдай тіркелген.

• Қолдау шаралары: Израиль тарапы қауіпсіздік мақсатында шектеулер қойғанымен, соңғы апталарда анклавқа 90 тоннаға жуық зиянкестермен күресу құралдары мен 1 мыңнан астам тышқан аулағыш жеткізілгенін хабарлады.

Соғыстан қажыған тұрғындар үшін бұл жағдай тек физикалық қауіп қана емес, үлкен моральдық соққы болуда. Мысалы, Хан-Юнис тұрғыны Амани Абу Селми егеуқұйрықтар оның үйлену тойына дайындаған жасауы мен дәстүрлі көйлегін кеміріп тастағанын айтып шағымданды.