Трамп соғысты аяқтағысы келеді, ал Иран қысымға көнбейді

АҚШ президенті Дональд Трамп Иранмен текетіресте Вашингтонның «айқын басымдықпен жеңіп жатқанын» мәлімдеді. Ол бұл туралы Truth Social желісінде жазып, америкалық қарулы күштердің әрекетін жоғары бағалады.

Трамптың сөзінше, АҚШ әскері Иранның әскери әлеуетіне ауыр соққы жасап, теңіз және әуе күштері мен әуе қорғаныс жүйелерін әлсіреткен. Тіпті ол бұл жағдайды «іс жүзінде режим ауысуы» деп сипаттады.

Сонымен қатар Ақ үй басшысы енгізілген блокада Иран экономикасына айтарлықтай зиян келтіріп отырғанын айтты. Оның бағалауынша, Тегеран күніне шамамен 500 млн доллар жоғалтуда. Трамп келісімге қол жеткізілмейінше қысым шаралары алынбайтынын да ескертті.

Президент АҚШ-тың жетекші басылымдарын қатаң сынға алды. Оның пікірінше, кейбір медиалар жағдайды бұрмалап көрсетіп, қоғамды да, қарсы тарапты да шатастыруда.

Трамптың айтуынша, мұндай ақпараттық фон соғыстағы нақты жағдайды көлегейлеп, АҚШ-тың әлсіз көрінуіне әкеледі.

Axios басылымының хабарлауынша, Трамп ұзаққа созылған қақтығысты қаламайды. Ақ үйдегі дереккөздер оның соғысты тезірек аяқтап, келісімге келуге мүдделі екенін айтады. Тіпті келіссөздер аясында Иран активтерін бұғаттан босату мүмкіндігі де қарастырылуда.

Ал Иран билігі керісінше, қысым жағдайында келіссөз жүргізбейтінін ашық мәлімдеді. Парламент спикері Мохаммад Багер Галибаф соңғы апталарда елдің жаңа әскери қадамдарға дайындалғанын жеткізді.

Оның айтуынша, АҚШ әрекеттері келіссөзді «капитуляцияға мәжбүрлеу құралына» айналдыруға бағытталған. Тегеран мұндай саясатты қабылдамайтынын және қажет болса қарсы жауап беретінін ескертті.