Трамп: Си Ормуз бұғазы бойынша көмектесуге дайын екенін айтты

АҚШ президенті Дональд Трамп Қытай басшысы Си Цзиньпин Ормуз бұғазы арқылы кеме қатынасын қамтамасыз етуге көмектесуге ниет білдіргенін айтты. Бұл туралы ол Fox News телеарнасына берген сұхбатында мәлімдеді.

Трамптың айтуынша, Си Цзиньпин Вашингтон мен Иран арасындағы келісімнің жасалуына мүдделі.

«Президент Си келісімге келгенімізді қалайды. Егер көмегі керек болса, қолдау көрсетуге дайын екенін айтты», – деді АҚШ басшысы.

Сонымен қатар Трамп Қытай жетекшісі Иранға әскери техника жеткізбеуге уәде бергенін атап өтті. Оның сөзінше, бұл маңызды мәлімдеме.

Ақ үй мәліметінше, Қытай Ормуз бұғазы арқылы тасымалданатын энергия ресурстарына тәуелділікті азайту үшін америкалық мұнайды көбірек сатып алуға қызығушылық танытып отыр. Тараптар бұғаздың халықаралық кеме қатынасына ашық болуы және әскери шиеленістен аулақ болуы қажет деген ортақ ұстанымға келген.

Ормуз бұғазы – әлемдегі маңызды теңіз жолдарының бірі. Қытай осы бағыт арқылы өтетін мұнайдың ең ірі импорттаушысы саналады. Иранға қатысты шиеленіске қарамастан, Пекин иран мұнайын сатып алуды жалғастырып келеді.

Батыс басылымдарының жазуынша, Қытай АҚШ пен Иран арасындағы келіссөздерде маңызды рөл атқаруы мүмкін. Сонымен қатар Пекин аймақтағы жағдайды өзінің экономикалық және әскери мүмкіндіктерін күшейту үшін пайдаланып жатқаны айтылуда.