Трамп Ресей мен оның серіктестеріне қарсы 100 пайыздық баж салығын енгізетінін мәлімдеді

АҚШ президенті Дональд Трамп алдағы 50 күн ішінде Ресей мен онымен сауда жасайтын елдерге қарсы “өте қатаң” баж салығын енгізетінін хабарлады. Бұл туралы ол Ақ үйде НАТО бас хатшысы Марк Рюттемен кездесу кезінде айтты.

Алайда Трамптың айтуынша, бұл шара тек Ресей мен Украина арасында бейбіт келісімге қол жеткізілмеген жағдайда ғана жүзеге асады. Президенттің сөзінше, баж салығының мөлшері 100 пайызға дейін жетпек. Ол бұл шараны “екінші деңгейлі тарифтер” деп атады, бірақ Ресеймен сауда жасайтын нақты қандай мемлекеттерге қатысты болатынын нақтыламады.

“Біз оларға (Ресейге – ред.) өте, өте наразымыз,” – деді Трамп.

Сондай-ақ АҚШ басшысы Ресеймен Украинаға қатысты соғысты тоқтату мақсатында төрт рет келісім жасауға тырысқанын айтып өтті.

“Біз бұл соғысты баяғыда тоқтатуымыз керек еді деп ойлаймын, бірақ ол әлі де жалғасып жатыр,” – деді ол.

Кездесу барысында Дональд Трамп Украинаға қару жеткізу мәселесін НАТО үйлестіретінін айтты. Оның сөзінше, бұл қару үшін альянс елдері төлем жасайды және оны қажетті аймақтарға жібереді. Өз кезегінде НАТО бас хатшысы Марк Рютте АҚШ басшысына Украинаға қажетті қару-жарақтың жеткізілетіні үшін алғыс айтты. Сонымен қатар, Трамптың айтуынша, Украинаға 17 дана Patriot зениттік-зымыран кешені жіберуге дайын тұр. НАТО елдері өздеріндегі кешендерді Украинаға береді, ал АҚШ оларды кейін алмастыратын жаңа жүйелермен қамтамасыз етпек.