Трамп пен Иран арасындағы “соңғы ұсыныс”: Әлем жаңа қақтығысты күтіп тұр ма

Пәкістан астанасында өткен тарихи келіссөздер әлем күткен нәтижені бермеді. АҚШ пен Иран арасындағы бейбітшілік орнату әрекеті ядролық бағдарламаға келіп тірелді. 21 сағатқа созылған марафондық талқылаудан соң, АҚШ вице-президенті Джей Ди Вэнс Исламабадтан аттанып кетті.

Джей Ди Вэнстің мәлімдемесіне қарағанда, Вашингтон Тегеранға "ең тиімді әрі соңғы" ұсынысын тастаған. Алайда Иран билігі атом қаруынан бас тарту туралы нақты кепілдік беруден бас тартты.

 "Бұл жаңалық АҚШ-тан қарағанда Иран үшін әлдеқайда ауыр болмақ", — деп түйіндеді Вэнс Air Force Two бортына отырар алдында.

АҚШ президенті Дональд Трамп келіссөздердің барысын басынан-ақ төмен бағалады. Ол Американың әскери артықшылығын алға тартып:

"Мәміле жасала ма, жоқ па, маған бәрібір. Біз оларды әскери жолмен талқандадық", — деп кесіп айтты. Сондай-ақ, Трамп Ормуз бұғазын миналардан тазартып, кеме қатынасын аша бастағанын мәлімдеді.

Иран тарапы бұл сәтсіздікке Вашингтонды айыптауда. Иран СІМ спикері Исмаил Багаидың айтуынша, 40 күндік соғыстан кейін сенімсіздік ұялаған ортада бір кездесумен мәселе шешілмейді. Сонымен қатар, Иранның Ислам революциясы сақшылар корпусы (КСИР) Трамптың бұғаз туралы сөзін жоққа шығарып, кез келген әскери кемеге қатал соққы беретінін ескертті.

Әзірге келіссөздердің жаңа раунды жоспарланбаған. Әлемдік қауымдастық екі апталық бітімнің соңы немен аяқталарын тағатсыздана күтуде.