Трамп Ормуз бұғазын бұғаттау басталғанын мәлімдеді

АҚШ президенті Дональд Трамп Ормуз бұғазын бұғаттау басталғанын мәлімдеді. Оның айтуынша, АҚШ әскери-теңіз күштері бұғазға кіретін немесе одан шығатын барлық кемені тоқтатады.

АҚШ-тың Орталық қолбасшылығы блокада Иран порттарының барлығына қатысты болатынын хабарлады. Ол 13 сәуір күні таңертең Вашингтон уақытымен күшіне енеді. Сондай-ақ АҚШ флоты халықаралық суларда Иранға өткені үшін төлем жасаған кемелерді анықтап, ұстайтыны айтылды.

Ақпарат құралдарының мәліметінше, соңғы апталарда Иран кейбір кемеден бұғаз арқылы өту үшін 1 млн долларға дейін алым алған. Мұндай шартқа шамамен 250 кеме келіскені, олардың көбі Иранмен байланысты болғаны хабарланды.

Трамп АҚШ бұғазды миналардан тазартуды бастайтынын және кез келген шабуылға қатаң жауап беретінін айтты. Сонымен қатар ол 11–12 сәуірде Пәкістанда өткен келіссөздерде тараптар ядролық мәселе бойынша ортақ шешімге келе алмағанын мәлімдеді.

Кейін Иранның Ислам революциясы сақшылар корпусы бұл аймаққа шетелдік әскери кемелердің келуін бітімді бұзу деп бағалайтынын хабарлады. Тегеран бұғаз өз бақылауында екенін және азаматтық кемелердің өтуіне белгілі шарттармен рұқсат берілетінін мәлімдеді.

Бұған дейін АҚШ пен Иран екі аптаға уақытша бітімге келген. Келісімнің бір шарты – әлемдік мұнай жеткізілімінің шамамен 20 пайызы өтетін Ормуз бұғазын ашу болған. Алайда Израильдің Ливанға жасаған соққыларынан кейін Иран бұғазды қайта жапқан.