Трамп: НАТО Украинаға АҚШ-тан қару сатып әпереді

АҚШ президенті Дональд Трамп NBC арнасына берген сұхбатында Вашингтон НАТО-ға қару сата бастайтынын, ал Альянс бұл қаруды Украинаға жеткізетінін мәлімдеді.

«Біз НАТО-ға қару жібереміз, және НАТО бұл қару үшін 100% ақы төлейді. Яғни, біздің жіберген қаруымыз НАТО-ға барады, содан кейін НАТО бұл қаруды Украинаға жеткізеді», – деді Трамп.

Оның айтуынша, бұл – АҚШ, НАТО және Украина арасындағы жаңа келісім. Тараптар бұл келісімге маусымда өткен НАТО саммитінде қол жеткізген. Президент, әсіресе, Patriot зениттік-зымыран кешендерін жеткізуді атады.

Трамп Ресейге көңілі толмайтынын да жасырмады.

«Менің Ресейге көңілім толмай отыр. Бірақ алдағы бірнеше аптада не болатынын көреміз. 14 шілде күні Ресейге қатысты маңызды мәлімдеме жасаймын», – деді ол.

Ал НАТО тарапы Трамптың бұл мәлімдемесіне әзірге түсініктеме берген жоқ. Альянстың бас хатшысы Марк Рютте 10 шілдеде X әлеуметтік желісінде Трамппен сөйлескенін және Украинаға көбірек оқ-дәрі мен әуе шабуылына қарсы жүйелер жеткізуге шақырғанын жазды.

Айта кетейік, бұған дейін АҚШ Украинаға қару-жарақты тікелей өз есебінен жеткізіп келген. Reuters мәліметінше, 2022 жылы басталған соғыстан бері АҚШ Конгресі Украинаға 175 миллиард доллар көлемінде көмек бөлген.

Трамп айтқан келісім НАТО қаржысы есебінен жүзеге аса ма, әлде мүше елдердің ұлттық бюджеттері арқылы жүргізіле ме, әзірге белгісіз. НАТО-ның жылдық бюджеті шамамен 4,6 млрд еуро болады, бұл жеке елдердің Украинаға көрсететін көмегінен бірнеше есе аз.

Альянс бюджетінің негізгі бөлігін АҚШ (15,88%) пен Германия (15,88%) құрайды. Одан кейінгі ірі үлес Ұлыбритания мен Францияға (10,19%), Италияға (8,53%) және Канадаға (6,68%) тиесілі. Қалған 26 елдің әрқайсысы 5%-дан аз үлеске ие.