Трамп: Израиль Газа секторында 60 күндік уақытша бітімге келуге келісті

АҚШ Президенті Дональд Трамп Израиль тарапы Вашингтон өкілдерімен кездесуде Газа секторында екі айлық атысты тоқтату шарттарын қабылдағанын мәлімдеді. Бұл туралы ол өзінің Truth Social әлеуметтік желісіндегі парақшасында жазды.

«Бүгін менің өкілдерім израильдіктермен Газа мәселесі бойынша ұзақ әрі нәтижелі кездесу өткізді. Израиль атысты тоқтату жөніндегі 60 күндік келісімге қажетті шарттарды қабылдады. Біз осы кезең ішінде барлық тараптармен соғысты тоқтату бағытында жұмыс істейтін боламыз», – деді Трамп.

АҚШ басшысының айтуынша, бейбітшілік орнату жолында белсенді еңбек етіп жатқан Қатар мен Египет өкілдері бұл ұсынысты ХАМАС ұйымына жеткізетін болады.

«Мен ХАМАС бұл келісімді қабылдайды деп үміттенемін. Себебі Таяу Шығыс үшін жағдай бұдан жақсармайды, тек ушыға түседі», – деп ескертті Трамп.

Бұған дейін америкалық БАҚ Израильдің стратегиялық жоспарлау министрі Рон Дермер Вашингтонға келгенін хабарлаған. Ол Ақ үй өкілдерімен Газа мен Ирандағы жағдайды және Израиль премьер-министрі Биньямин Нетаньяхудың АҚШ-қа сапарын талқылайды деп күтілген.