Трамп Иранның соғысты тоқтату туралы ұсынысына қатысты пікір білдірді

АҚШ Президенті Дональд Трамп пен оның ұлттық қауіпсіздік командасы Иранның Ормуз бұғазын ашу және соғысты тоқтату туралы ұсынысын қабылдамады. 28 сәуірге қараған түні Reuters пен The Wall Street Journal басылымдары хабарлағандай, Вашингтон Тегеранның ядролық бағдарлама мәселесін кейінге қалдыру туралы жоспарына күмәндана қараған.

Ақ үй өкілдерінің айтуынша, Иранның ядролық бағдарламасы келіссөздердің басты шарты болуы тиіс. Ақ үйдің баспасөз хатшысы Оливия Уэйлс Құрама Штаттардың өз «қызыл сызықтарын» нақты белгілегенін және баспасөз арқылы келіссөз жүргізбейтінін мәлімдеді. Ал Иран тарапы ұсынған үш кезеңдік жоспар бойынша, алдымен соғысты тоқтатуға кепілдік беріліп, Ормуз бұғазы ашылуы тиіс еді, тек содан кейін ғана ядролық мәселелер талқылануы керек болатын.

Осы текетірес салдарынан әлемдік нарықта мұнай бағасының өсуі жалғасуда. Ормуз бұғазындағы блокадаға байланысты соңғы күндері Иранның кем дегенде алты танкері кері қайтуға мәжбүр болған. Kpler және SynMax компанияларының деректері бойынша, 27 сәуірде бұғаздан небәрі жеті кеме өткен, ал соғысқа дейін бұл көрсеткіш күніне 140-қа дейін жететін.

Екі айға созылған соғыс пен мұнайдың қымбаттауы АҚШ ішінде Дональд Трамптың беделіне нұқсан келтіріп, рейтингінің төмендеуіне әкеп соқты. Осы тұста Иран СІМ басшысы Аббас Арагчи Ресейге сапары кезінде Вашингтонның соғыста ешқандай мақсатына жете алмағанын мәлімдеп, Трамптың өзі келіссөз жүргізуге мүдделі екенін алға тартты.