Трамп: АҚШ Украинаға қару жеткізуді жалғастырады

АҚШ президенті Дональд Трамп 7 шілде күні кешке Израиль премьер-министрі Биньямин Нетаньяхумен Ақ үйдегі мемлекеттік кешкі ас барысында Украинаға көбірек қару-жарақ жеткізілетінін мәлімдеді. Оның айтуынша, бұл негізінен қорғаныс мақсатындағы құралдар болмақ.

– Біз мұны істеуіміз керек. Олар өздерін қорғай алуы тиіс. Қазір Украинаға өте ауыр соққылар жасалып жатыр, – деді АҚШ басшысы.

Сондай-ақ Трамп Ресей президенті Владимир Путинмен 3 шілдеде болған телефон әңгімесінің нәтижесіне көңілі толмағанын қайталап айтты. Ол «Путин соғысты тоқтатқысы келмейді, адам өлтіруді жалғастырып жатыр» деп мәлімдеді.

Осыдан кейін Ресей әскері түн ішінде Украинаға қарсы 550-ден астам зымыран мен дрон ұшырған.

Әскери көмекті уақытша тоқтату және қайта жандандыру мүмкіндігі

2 шілдеде америкалық БАҚ АҚШ Украинаға кейбір оқ-дәрі түрін жеткізуді уақытша тоқтатқанын жазды. Олардың арасында Patriot кешеніне арналған зымырандар, Stinger ПЗРК, NASAMS жүйесі мен F-16 ұшақтарына арналған ракеталар бар.

Politico басылымының жазуынша, қазіргі таңда АҚШ бұл шешімді қайта қарастырып жатыр. Бұл мәселе Трамптың арнайы өкілі Кит Келлог пен Украина қорғаныс министрі Рүстем Умеровтің екі кездесуінде талқыланбақ.

Вашингтондағы пікірталастар мен тексерулер

Трамп 3 шілдеде «Байден елді күйретіп кетті, алдымен өзіміздің қажеттілігімізді қамтамасыз етуіміз керек» деп, көмек жеткізуді тоқтата тұру себебін түсіндірген. Алайда 4 шілдеде NBC News жариялаған мәліметке сәйкес, Пентагондағы тексеріс АҚШ-та оқ-дәрі тапшылығы жоқ екенін көрсеткен. Ақпарат көздерінің мәліметінше, бұл шешім Пентагон басшысы Пит Хегсет пен оның орынбасары Элбридж Колбидің бастамасы болған. Колби Қытайға қарсы Тынық мұхит аймағындағы қорғанысқа басымдық беру керек деп есептейді.

Трамптың Мерц пен Зеленскиймен әңгімесі

4 шілдеде Трамп Германия канцлері Фридрих Мерц және Украина президенті Владимир Зеленскиймен телефон арқылы сөйлесті. Берлиннің мәліметінше, Мерц Украинаға көмекті жалғастыруға шақырып, неміс тарапы АҚШ-тан Patriot жүйесін сатып алу мүмкіндігін қарастырып жатыр.

Зеленский бұл әңгімені «маңызды әрі нәтижелі» деп атап өтті. Оның айтуынша, тараптар Украина аспанын қорғауды күшейту, бірлескен қорғаныс өндірісі мен инвестициялық мүмкіндіктерді талқылаған.